प्रतिनिधि सभा तथा प्रदेशसभा निर्वाचन नजिकिँदै गर्दा झापा–३ मा चुनावी सरगर्मी बढेको छ । उम्मेदवारहरू जनताको घरदैलोमा पुगेर मत माग्ने, स–साना कोण सभा गर्ने र आफ्नो कुरा सुनाउने काममा व्यस्त छन् । 

‘हेवी–वेट’ उम्मेदवार रहेको झापा–३ मा यस पटक पनि नेपाली कांग्रेस र राष्ट्रिय प्रजातन्त्र पार्टी(राप्रपा) बीच नै मुख्य प्रतिस्पर्धा हुने देखिएको छ ।

राप्रपा अध्यक्ष राजेन्द्र लिङ्देन र कांग्रेसका नेता कृष्णप्रसाद सिटौला चुनावी मैदानमा छन् ।

राप्रपा अध्यक्ष लिङ्देनलाई एमालेको समर्थन छ । तर, एमालेको केन्द्रीय निर्णयविपरीत एमालेका स्थानीय नेताले डम्बरबहादुर गिरीले बागी उम्मेदवारी दिएका छन् । 

सिटौला कांग्रेस, माओवादी केन्द्र र नेकपा एकीकृत समाजवादीको साझा उम्मेदवार हुन् ।  

२०७४ को चुनावमा पनि लिङ्देन र सिटौलाले नै चुनावी प्रतिस्पर्धा गरेका थिए । त्यसबेला पनि लिङ्देनलाई एमालेको समर्थन थियो । एमालेको सहयोगमा लिङ्देन संसद छिरेका थिए । त्यसबेला, राप्रपाले देशभरमा एक सिट मात्रै जित्दा त्यसको रेकर्ड लिङ्देनले नै बनाएका थिए ।

कांग्रेस नेता सिटौला भने अघिल्लो चुनावको नतिजा उल्ट्याउने दावीसहित चुनावी स्पर्धामा छन् । लिङ्देन पनि आफ्नो विजय इतिहास कायम राख्ने दावी गर्छन् ।  

राप्रपाका अध्यक्ष लिङ्देनले विगत ५ वर्षका कांग्रेस नेता सिटौलाले अहिलेसम्म गरेकोभन्दा दोब्बर काम गरेका कारण जनताले आफूलाई विश्वास गरेको दावी गर्छन् ।

एमालेको सहयोगमा चुनाव जित्दै आएका लिङ्देनलाई भने बागी उम्मेदवार गिरीले चुनौती थपेका छन् ।  

गिरी गत स्थानीय तहको चुनावमा हल्दीबारी गाँउपालिकाको अध्यक्षमा उम्मेदवार बनेका थिए । त्यसबेला उनले चुनाव जित्न सकेनन् ।

अघिल्लो कार्यकालमा भने उनी गाउँपालिकाको उपाध्यक्ष थिए । उनले प्रतिनिधि सभा चुनावमा झापा–३ बाट टिकटको दावी गरेका थिए तर, एमाले अध्यक्ष केपी ओलीले झापा–३ मा लिङ्देनलाई सघाउने निर्णय गरिदिए । टिकट नपाएपछि गिरीले ओलीको निर्णयलाई चुनौती दिएर स्वतन्त्र उम्मेदवारी दर्ता गरेका थिए । 

२०७४ को प्रतिनिधिसभा निर्वाचनमा लिङ्देनले ४४ हजार ६१४ मत पाउँदा कांग्रेसका सिटौलाले ३१ हजार मत मात्रै पाएका थिए । 

यस  पटक झापा–३ मा लिङ्देन र सिटौलासहित १८ जना उम्मेदवार चुनावी मैदानमा छन् । 

असन्तुष्ट मतदाता निर्णायक

झापा–३ को चुनावी प्रतिस्पर्धा यस पटक पनि रोचक हुने स्थानीय मतदाता बताउँछन् । दुई उम्मेदवारको तीब्र प्रतिस्पर्धाका बीच कसले बाजी मार्छ भन्ने अहिल्यै आकलन गर्न सकिहाल्ने अवस्था छैन । 

सम्बन्धित उम्मेदवारसँग असन्तुष्ट रहेका मतदाताको ‘मुभ’ कस्तो हुन्छ भन्ने कुराले नतिजा प्रभावित हुने झापा–३ का मतदाताको विश्लेषण छ ।

‘मतदाता दुवै उम्मेदवारसँग असन्तुष्ट छन् । लिङ्देन र सिटौला दुवैलाई मन नपराउने मतदाताको संख्या ठूलो छ । उनीहरूले कसलाई मत दिन्छन् भन्ने कुराले यहाँको निर्वाचन नतिजा प्रभावित हुन्छ’, हल्दिबारीका स्थानीय भक्तबहादुर भण्डारीले भने । भण्डारी कम्युनिष्ट पृष्ठभूमिका मतदाता हुन् । २०१५ सालमै कम्युनिष्टको झण्डा बोकेर राजनीतिमा लागेको उनले बताए ।

भण्डारीले भने ‘यो पटक गत वर्षको भन्दा पनि रोचक प्रतिस्पर्धा हुने देखिएको छ । बागी उम्मेदवारले एमालेको केही भोट काट्छन् । एमालेका असन्तुष्ट कार्यकर्ताले जता भोट हाल्छन् उसैको पल्ला भारी हुने देखिएको छ ।’

त्यसबाहेक, झापा–३ मा अनिर्णित मतदाताको संख्या पनि ठूलो छ । उनीहरू लिङ्देन रोज्छन् कि सिटौला भन्ने कुराले पनि संसद छिर्ने प्रमाण कसले पाउँछ भन्ने यकिन हुन्छ । 

यसअघिका ६ वटा चुनावमा मतदान गरेकी लक्ष्मी तिम्सिना नेताहरूको भाषणमा आधारमा भोट नहाल्ने बताउँछिन् । 

‘गाउँ समाजको अवस्था हेर्दा नेताको पहलमा परिवर्तन भएको देखिँदैन । खराबमध्ये कम खराबलाई छानेर भोट दिनुपर्ने अवस्था छ’, उनी भन्छिन्, ‘नेताको भाषण सुनेर भोट दिने दिन गए । एउटै काम सबै नेताले मैले नै गरेको भन्छन् । हामीले कसको कुरा पत्याउने ?’

झापा–३ का अर्का मतदाता विजय ठाकुरले स्वास्थ्य, शिक्षा, विकास निर्माणमा आदिमा जसको बढी योगदान छ उसैलाई मत दिने सोचाइमा रहेको बताए ।

स्थानीयले खानेपानीको अभाव, सडकको दुरावस्था, जंगली हात्तीको आतंक सधैं भोग्नु परेको गुनासो गरे । त्यसबाहेक, समयमा मल–बिउ नपाउने, उत्पादनले उचित मूल्य र बजार नपाउने समस्याले नेताहरूले ध्यान नदिएको गुनासो पोखे । यिनै समस्यालाई समाधान गर्न पहल गर्ने दल र नेता हेरेर मत दिने अर्का मतदाता सुरेन्द्र भट्टराईले बताए । 

कतिपय मतदाताले भने झापा–३ मा युवाहरूको मुद्दा उठाउने उम्मेदवार खोजेका छन् । तर, उम्मेदवार भएकामध्ये युवाको मुद्दामा ध्यान दिएका व्यक्ति नपाएको उनीहरूको गुनासो छ ।

युवालाई अघि बढाउने भनेर आएका स्वतन्त्र उम्मेदवार पनि विश्वास गरिहाल्ने प्रकृतिका नभएको उनीहरूले बताए । उनीहरूको एजेन्डा पनि राप्रपा र कांग्रेसको भन्दा फरक नरहेको स्थानीय युवा मतदाताहरू बताउँछन् ।

‘स्थानीय जनताको आवश्यकता र विकासमा ध्यान दिने नेतृत्व रोजेर मत दिन्छु । तर, अहिले नै कसलाई मत दिने भन्ने निर्णय गरिसकेको छैन’, युवा मतदाता पंकज साहले भने ।

हल्दीबारी गाउँपालिकाको पाराखोपी बजारमा डकर्मी काम गर्दै आएका सुवासचन्द्र राजवंशी भने जसलाई मत दिए पनि आफ्नो सुखको दिन नआएको बताउँछन् ।