उद्यमशीलता गर्ने हो भने आर्थिक उपार्जनमा सफल हुन सकिन्छ भन्ने उदाहरण बनेका छन् भारतको बुरहानपुरका एक युवक । बुरहानपुरका सन्दीप जगन्नाथ रावलले मसला बेचेर मासिक ३ लाख रुपैयाँ कमाइरहेका छन् ।

भारतीय सञ्चारमाध्यम नवभारत टाईम्सका अनुसार उनी आफू मात्रै सफल भएका छैनन्, बरु अन्य २५ जनालाई रोजगारी समेत दिइरहेका छन् ।

सन्दीप ७ वर्षअघिसम्म घरघरमा पुगेर मसला बेच्ने काम गर्थे । उनको परिवारको आर्थिक अवस्था ठीक थिएन । मुस्किलले घर गुजारा चलाउनुपर्ने बाध्यता थियो ।

उनले मसला बेचिरहेकै बेला मध्य प्रदेश सरकारको ‘एक जिल्ला एक उत्पादन’ योजनाबारे जानकारी पाए । उनले सरकारी योजनामा आवद्ध हुने सोच बनाए । योजनाअन्तर्गत उनले ४० लाख रुपैयाँ ऋण लिए र मसला उद्योग खोले । यसमा उनले सरकारबाट १३ लाख ६० हजार रुपैयाँ अनुदान पाए । यसरी उनले मसला उद्योग स्थापना गरे ।

मसला उद्योग खोलेपछि कोरोना महामारीसँगै भएको लकडाउनका बेला उनले अप्ठ्यारो परिस्थितिको सामना गर्नुपर्‍यो तर महामारी अन्त्य भएसँगै उनको मसला उद्योग फस्टाएको छ ।