गायक दुर्गेश थापा पछिल्लो समय मेला महोत्सवमा ब्यस्त देखिएका छन् । देशका विभिन्न जिल्लामा भइरहेका स्टेज कार्यक्रममा पुगेर उनले आफ्नो साङ्गीतिक प्रस्तुतिमार्फत माहोल तताइरहेका छन् । 

उनै गायक थापा शनिबार कपिलवस्तुमा आयोजित ‘सातौंँ चन्द्रौटा महोत्सव’मा पुगेर प्रस्तुति दिए । उनलाई र उनको प्रस्तुति हेर्न महोत्सवमा दर्शकहरुको बाक्लो भीड लागेको थियो । 

उक्त महोत्सवमा प्रस्तुति दिँदै गर्दा उनीमाथि ढुंगा प्रहार भएको हल्ला समेत यतिबेला चर्चामा छ । 

केही स्थानीय अनलाइनहरुमा समेत उनीमाथि ढुंगा प्रहार भएको भनेर समाचारहरु आएका छन् । 

गायक दुर्गेशले भने उक्त कुरा हल्ला मात्रै भएको बताएका छन् । ‘केही भएको होइन् । त्यो कुरा हल्ला मात्रै हो’ लोकान्तरसँग कुरा गर्दै उनले भने, – ‘मैले कार्यक्रमको भिडियो एवं फोटो पनि फेसबुकमा राखेको छु । एकदमै राम्रो तरिकाले कार्यक्रम भएको थियो ।’

त्यहाँको स्थानीय तहका प्रमुखले नै फेसबुकमा स्टाटस् लेखेर गलत हल्ला फैलाएको दुर्गेशको आरोप छ । 

स्थानीय तहका प्रमुख र मेला आयोजक संस्थाका अध्यक्ष फरक राजनीतिक दलको रहेको कारण नगरप्रमुखले गलत हल्ला फैलाएको दुर्गेशको आरोप छ ।

मेला बिथोल्नका लागि गलत हल्ला फैलाएको उनी बताउँछन् ।

‘स्थानीय सञ्चारमाध्यमलाई प्रयोग गरेर गलत लेख्न लगाइएको हो’ दुर्गेशले भने, – ‘८ हजार बढी दर्शक हुनुहुन्थ्यो, यदि मलाई ढुंगा हानेको भए कसै न कसैको भिडियोमा पनि देखिन्थ्यो होला ! यो सबै अफवाह हो ।’ 

महोत्सवमा बढेको ब्यस्तता
दुर्गेशले महोत्सवमा प्रस्तुती दिँदै गर्दाको भिडियो र तस्वीरहरु फेसबुकमा शेयर गरेका छन्, जहाँ दर्शकको बाक्लो भीड देखिन्छ ।

भिडियोमा दर्शकहरुले उनको नाम लिँदै चर्को हुटिङ गरेका छन् ।

केही समय मेला महोत्सवबाट सुस्ताएजस्तो देखिएका दुर्गेशको ब्यस्तता केही समययता फेरि बढेको छ ।

उनी हिजोआज दिनहूँजसो स्टेज कार्यक्रममा ब्यस्त बनिरहेका छन् । र, मेला महोत्सवमा उनको क्रेज पनि राम्रो देखिने गरेको छ ।