सुदूरपश्चिम प्रदेश प्रहरी कार्यालयले प्रदेशभित्र रहेका तराईका जिल्लामा लागुऔषधविरुद्धको महाअभियान सञ्चालन गर्ने जनाएको छ । सो क्षेत्रमा लागूऔषध ओसारपसार घटना बढेपछि प्रहरीले सो महाअभियान सञ्चालन गर्ने निर्णयमा पुगेको हो ।

खुलानाका भएका कारण बढ्दै गएको लागुऔषध ओसारपसार रोक्न सो अभियान सञ्चालन गरिन लागिएको प्रहरीको भनाइ छ । प्रदेश प्रहरी कार्यालयले कैलाली कञ्चनपुरका स्थानीय तहका जनप्रतिनिधि तथा औषधि व्यवसायी संघसँग आज विहान छलफल गर्दै समन्वय तथा सहयोगका लागि अपिल गरेको छ।

प्रहरी नायव महानिरीक्षक अशोक सिंहले लागुऔषधका कारण जघन्य अपराध तथा सवारी दुर्घटना बढ्दैगएकाले जथाभावी प्रयोगमा कारबाहीसँगै सचेतना फैलाउन जरुरी रहेको बताए। 

कैलालीका प्रमुख जिल्ला अधिकारी युवराज कट्टेलले लागूऔषध ओसारपसारका घटना प्रहरीले मात्र रोक्न नसक्ने भन्दै समाजका सदस्यले पनि सहयोग गर्नुपर्ने बताए । धनगढी उपमहानगरपालिकाका प्रमुख गोपाल हमालले जथाभावी लागुऔषध बिक्री–वितरणमा रोक लगाउन औषधि सञ्चालकको भूमिका पनि आवश्यक रहेको बताए। नागरिक तहबाट त्यसमा सहयोग भएमात्र नियन्त्रण गर्न सकिने उनको सुझाव छ ।