नेकपा एमालेका अध्यक्ष केपी शर्मा ओली गृह जिल्ला झापा आएकै मौका छोपी दुर्गा प्रसाईँले पूर्वराजालाई ल्याएर कार्यक्रम गरेका छन् ।

एमालेका केन्द्रीय सदस्यसमेत रहेका प्रसाईँले सोमबार ‘राष्ट्र, राष्ट्रियता, धर्म, संस्कृति र नागरिक बचाउने महाअभियान’ को शुभारम्भ गरेका छन् ।

उक्त कार्यक्रम पूर्वराजा ज्ञानेन्द्र शाहले उद्घाटन गरेका छन् ।

उनको अभियान झापाको काँकडभिट्टाको मेची पुलबाट शुरू भएको छ । उनले अभियानलाई महाकालीसम्म पुर्‍याउने बताएका छन् ।

प्रसाईँले पूर्वराजा शाह, युवराज पारस शाह र उनको परिवारका सदस्यहरूलाई एकै मञ्चमा राखेर अभियान शुरू गरेका थिए ।

काँकडभिट्टामा उनले कार्यक्रम गर्दा एमालेका अध्यक्ष ओली भने झापा क्षेत्र नम्बर ५ मा पाटीका कार्यकर्ता तथा मतदाता भेट्न व्यस्त थिए ।

अभियानका लागि भन्दै प्रसाईँले प्रधानमन्त्री पुष्पकमल दाहाल 'प्रचण्ड', एमाले अध्यक्ष केपी शर्मा ओली, कांग्रेस सभापति शेरबहादुर देउवालाई पनि निम्त्याएका थिए ।

तर उनीहरू भने कार्यक्रममा सहभागी भएनन् ।  पूर्वराजा ज्ञानेन्द्र शाह, पूर्वयुवराज पारस शाह, पूर्वअधिराजकुमारी प्रेरणा शाहसहित राजपरिवारका सदस्यहरू ल्याएर प्रसाईँले कार्यक्रम गरेका हुन्। 

प्रसाईँले पूर्वराजालाई ल्याएर कार्यक्रम गरेपछि एमालेका जिल्ला स्तरका नेताहरूले भने विरोध गरेका छन् ।

पार्टीको विधि प्रक्रियाबाहिर रहेर केन्द्रीय नेताले नै कार्यक्रम गर्नु गलत भएकाले कारबाही हुनुपर्ने जिल्ला स्तरका नेताहरूले बताएका छन्।

केन्द्रका नेताहरू सबै जानकार भएकाले यसको फैसला चाँडै आउने एमाले झापाका अध्यक्ष दीपक कार्कीले बताए ।

‘बैंकको महँगो ब्याजले व्यावसायी आत्महत्या गर्ने ठाउँमा पुगेको भन्दै एकातिर कुरा उठाइरहनुभएको छ,’ अध्यक्ष कार्कीले भने, ‘धर्मको पनि नाम जोडिरहनुभएको छ । उहाँको काम कारबाही कन्ट्रोभर्सी छन्।’

देशको कार्यकारी पदमा नभएको व्यक्ति (पूर्वराजा) लाई ल्याएर उद्योगी व्यापारीका समस्या समाधान गर्न नसक्ने पनि कार्कीले बताए ।

‘धर्मका कुरा उठाएर समस्या कसरी समाधान हुन्छ ? उहाँले समस्या भएको कुरा पाटी केन्द्रीय कमिटीभित्र पनि उठाउनुभएको भए हुन्थ्यो । एकातिर धर्मको कुरा गरेको छ अर्कातिर बैंकले मारो भनको छ, हामी रम्यौं भनेको छ । उहाँले धर्मको अर्कै मोड लिन खोज्नु भएको हो । अब म राजा ल्याउन सक्छु । राजेन्द्र लिङदेनले ल्याउन सक्दैनन् भन्ने कुरा गर्दै हिँड्नुभएको छ । धर्मको रक्षक म हुँ देश बचाउ भनेर भनेको छ । नेतृत्वले बुझेको छ । केही गर्ला, यतिकै त नराख्ला, राख्नु पनि हुँदैन’, अध्यक्ष कार्कीले आक्रोश भावमा भने।

यता नेकपा एमालेका उपाध्यक्ष सुवास नेम्वाङले भने अध्यक्ष झापामै भएका बेला कार्यक्रम भएकाले यसबारे आफूलाई जानकारी नभएको बताए ।

उनले यस विषयमा कुनै पनि टिप्पणी नगर्नेसमेत बताए ।