३१ असार २०८३, बुधबार
निर्वाचन आयोगले बिहीबार सम्पन्न राष्ट्रपति निर्वाचनको मत परिणामसहितको प्रतिवेदन आज राष्ट्रपति विद्यादेवी भण्डारीसमक्ष बुझाउने भएको छ । राष्ट्रपति तथा उपराष्ट्रपतिको निर्वाचनसम्बन्धी ऐन, २०७४ को दफा ६० बमोजिम आयोगले निर्वाचनको परिणामसहितको प्रतिवेदन राष्ट्रपतिसमक्ष बुझाउन लागेको हो । आयोगका प्रवक्ता शालिग्राम शर्मा पौड्यालका अनुसार ऐनले गरेको व्यवस्थाअनुसार प्रतिवेदन बुझाउन लागिएको हो ।
हिजो सम्पन्न राष्ट्रपति निर्वाचनमा नेपाली कांग्रेसका वरिष्ठ नेता रामचन्द्र पौडेल मुलुकको तेस्रो राष्ट्रपतिका रूपमा निर्वाचित भएका छन् । संघ तर्फको १६ हजार ९०६ र प्रदेशतर्फको १६ हजार ९६ गरी कुल ३३ हजार ८०२ मतभारसहित पौडेल निर्वाचित भएका थिए । प्रतिस्पर्धी नेकपा (एमाले) का उपाध्यक्ष सुवासचन्द्र नेम्वाङले प्रदेशतर्फ सात हजार ७७६ र संघतर्फ सात हजार ७४२ गरी कुल १५ हजार ५१८ मतभार प्राप्त गरेका थिए । प्रतिवेदन आज दिउँसो बुझाउने आयोगले जनाएको छ ।
