इटहरी उपमहानगरपालिकाले खाजा र इन्धनका नाममा वितरण गरिने खर्च कटौती गरेको छ। 

उपमहानगरपालिकाले खाजाबापत मात्र वार्षिक २ करोड रुपैयाँभन्दा बढी खर्च गर्ने गरेको थियो।   

कर्मचारीको खाजा भत्ता र सवारी इन्धन कटौती गर्दा उपमहानगरपालिकालाई झण्डै ३ करोड रुपैयाँ बचत हुने भएको हो ।

कार्यपालिकाको बैठक बसेर तेल सुविधा कटौती गर्ने निर्णय गरेको हो । प्रधानमन्त्री पुष्पकमल दाहाल 'प्रचण्ड'ले अतिरिक्त खर्च कटौती गर्न निर्देशन  दिएपछि महानगरले निर्णय नै गरेर मासिक दिँदै आएको खर्च कटौती गरेको हो।

प्रशासनिक खर्च घटाउन उपपमहानगरपालिकाले कर्मचारीले पाउँदै आएको मासिक खाजाभत्ता र  तेल पाउने सुविधा कटौती गर्ने  निर्णय गरेको  इटहरी उपमहानगरपालिकाले जनाएको छ । उपमहानगरपालिकाले मासिक ५ हजार खाजाबापत दिँदै आएको थियो ।

फागुन २६  गते बसेको १२८ औँ कार्यपालिका बैठकले खाजा भत्ता र तेलको सुविधा कटौती गर्ने निर्णय भएको नगर प्रमुख हेमकर्ण पौडेलले बताए ।  कर्मचारीलाई मासिक १० लिटर इन्धन दिइने गरिएको थियो। 

चैत १  गतेबाट लागु हुनेगरी खाजा र तेल रोक्ने निर्णय गरिएका मेयर पौडेलले बताए । 

उपमहानगरपालिकामा ४७० जना कर्मचारी छन् । ती कर्मचारीका लागि खाजा भत्तामा वार्षिक करिब २ करोड ८२ लाख  हाराहारी खर्च हुँदै आएको थियो । तेल कटौती हुँदा वार्षिक एक करोड सात लाख रुपैयाँ हाराहारी रकम  जोगिने मेयर पौडेलले बताए  ।

उपमहानगरपालिकाको खाजा भत्ताका विषयमा  महालेखा परीक्षकको कार्यालयले पनि कटौती गर्न  सुझाव दिएको थियो ।