पाथीभरामा थप हेल्थ डेस्क स्थापना गरिँदै

ताप्लेजुङमा अवस्थित प्रसिद्ध धार्मिकस्थल पाथीभरा (मुकुम्लुङ) दर्शन गर्ने भक्तजनको लागि थप ‘हेल्थ डेस्क’ स्थापना हुने भएको छ ।

पाथीभरा मन्दिरमा दर्शन गर्न आउने तीर्थयात्रीको सहजताको लागि  हेल्थ डेस्क स्थापना गर्न लागेको हो ।

पाथीभरा पदमार्गको दोबाटो पानी ट्यांकी आसपासमा १ र ३ हजार ७९४ मिटर उचाइको पाथीभरा मन्दिरमा १ गरी २ थप हेल्थ डेस्क स्थापना गर्ने तयारी भएको जिल्ला प्रशासन कार्यालयका सूचना अधिकारी तथा सहायक प्रमुख जिल्ला अधिकारी टंकबहादुर भट्टराईले बताए ।

अहिले पाथीभराको ठूलो फेदीमा स्वास्थ्यकर्मी र औषधि सहितको हेल्थ डेस्क सञ्चालनमा भइरहेको छ । अस्पताल, नेपाली सेनाको भीमकाली गुल्म, नेपाल प्रहरी र सशस्त्र प्रहरी बल नम्बर १ गुल्म सहितको सहयोगमा तीर्थालुको चाप बढी हुने समय अवधिभर थप हेल्थ डेस्क सञ्चालनमा ल्याउने तयारी भएको पाथीभरा क्षेत्र विकास समितिका अध्यक्ष रक्की थेबेले बताए ।

पाथीभरा क्षेत्रमा सञ्चालनमा रहेको होटलमा आवास तथा खानाको सहुलियतपूर्ण मूल्य निर्धारण समेत गरिएको छ ।

मन्दिर क्षेत्र र त्यहाँको आवास प्रबन्ध सहितको जानकारी दिन सदरमुकाम फुङ्लिङमा सूचना केन्द्र सञ्चालनमा ल्याउने तयारी समेत गरिएको पाथीभरा क्षेत्र विकास समितिले जनाएको छ ।