‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेका २४ घण्टाका मुख्यमुख्य घटनाक्रमसहित उपस्थित भएका छौँ–
प्रधानमन्त्री पुष्पकमल दाहाल ‘प्रचण्ड’ ले मन्त्रिपरिषद् पुनर्गठनको अन्तिम तयारी गरेका छन् । प्रचण्डले दलहरुसँग छलफल गरेर सोमबारसम्ममा मन्त्रिपरिषद् पुनर्गठनको तयारी गरेका हुन् । 
प्रधानमन्त्रीको दल माओवादी केन्द्रले सोमबारसम्म मन्त्रिपरिषदलाई पूर्णता दिने निर्णय नै गरेको छ । पार्टी केन्द्रीय कार्यालयमा पेरिसडाँडामा शनिबार अपरान्ह बसेको पदाधिकारी बैठकले सो निर्णय गरेको हो ।
००००
सरकारमा नेपाली कांग्रेसले ८ वटा मन्त्रालय पाउने भएको छ । प्रधानमन्त्री प्रचण्ड र कांग्रेस सभापति शेरबहादुर देउवाबीच भएको छलफलमा कांग्रेसले ८ वटा मन्त्रालय पाउने सहमति भएको हो ।
जसअनुसार कांग्रेसभित्र यसबारे छलफल भएर कसको  नेतृत्वमा सरकारमा जाने भन्नेबारे सामान्य छलफल भएको छ । शनिबार सभापति निवासमा बसेको पदाधिकारी बैठकमा देउवाले पार्टीले ८ वटा मन्त्रालय पाउने सहमति भएको जानकारी दिएका थिए । बैठकमा पूर्णबहादुर खड्काको नेतृत्वमा सरकारमा जाने कि भन्नेबारे सामान्य छलफल भएको कांग्रेस स्रोतले बतायो ।
००००
यसैगरी माओवादी केन्द्रले प्रधानमन्त्री बाहेक ५  वटा मन्त्रालय पाउने मोटामोटी सहमति भएको छ । सत्ता गठबन्धनमा भएको छलफलमा सो सहमति भएको हो । 
बालुवाटार स्रोतका अनुसार  एकीकृत समाजवादीले २ वटा मन्त्रालय तथा जसपाले पनि २ वटै मन्त्रालय पाउने गरी सकारात्मक छलफल भएको छ । 
सरकारमा सहभागी हुन चाहने अन्य पार्टीलाई भने १–१ वटा मन्त्रालय दिनेगरी सहमति भएको छ । कसले कुन मन्त्रालय लिने भन्नेबारे आइतबार थप छलफल हुने बताइएको छ । 
००००
नेपाली कांग्रेस गण्डकी प्रदेश संसदीय दलका नेता सुरेन्द्र पाण्डेले नेकपा एमाले नेतृत्वको वर्तमान सरकारलाई दूरगामी प्रकृतिका निर्णय नलिन र कार्यान्वयन नगर्न ध्यानाकर्षण गराएका छन् ।    
संसदीय दलका तर्फबाट आयोजित पत्रकार सम्मेलनमा उनले माओवादीले समर्थन फिर्ता लिएसँगै वर्तमान गण्डकी प्रदेश सरकार अल्पमतमा परेको भन्दै कुनै पनि दूरगामी प्रकृतिका निर्णय नलिन र कार्यान्वयन नगर्न ध्यानाकर्षण गराएका हुन् ।
००००
संस्कृति, पर्यटन तथा नागरिक उड्डयनमन्त्री सुदन किरातीले राष्ट्रिय ध्वजावाहक नेपाल वायुसेवा निगम सुधार्न विशेष महत्व दिएको बताएका छन् ।
निकै कमजोर अवस्थामा रहेको निगमको हालको अवस्थालाई सुधारेर साँच्चिकै गौरव गर्न लायक ध्वजावाहक बनाउन विभिन्न प्रयत्न भइरहेको उनले उल्लेख गरे ।
००००
नेकपा एकीकृत समाजवादीका अध्यक्ष माधवकुमार नेपालले नेपाल–भारतबीचको सम्बन्ध परम्परागतदेखि प्रगाढ रहिआएको बताएका छन् ।
नेपाल–भारतका पत्रकारको संस्था ‘मिडिया फर बोर्डर हार्मोनी’ले ईशनाथ नगरपालिकाको ईशनाथ मठ परिसरमा शनिबार आयोजना गरेको नेपाल–भारतमैत्री संवादमा उनले नेपाल–भारतबीचको सम्बन्ध सौहार्दपूर्ण रहिआएकाले यसलाई अझ सबल बनाउँदै लैजानुपर्नेमा जोड दिए ।
००००
नेकपा एमालेका अध्यक्ष एवं पूर्वप्रधानमन्त्री केपी शर्मा ओलीले आफू नेतृत्वको पार्टी समृद्ध समाज निर्माणको अभियानमा जुटेको बताएका छन् । कपिलवस्तुको सिद्धार्थ क्याम्पस शनिबार आयोजित अगुवा कार्यकर्ता भेला तथा प्रशिक्षण कार्यक्रमलाई सम्बोधन गर्दै उनले देशलाई समृद्ध बनाउने योजना आफूले सुरु गरेको दाबी गरे ।
००००
कोशी प्रदेश नामकरणको विरोधमा मृत्यु भएका पदम लिम्बू घटनाको छानबिन गर्न सरकारले समिति बनाउने निर्णय गरेको छ।  गत चैत ५ गते भएको घटनामा लिम्बूको मृत्यु भएको थियो।
००००
राप्रपा नेपालका अध्यक्ष कमल थापाले प्रदेश तहका संरचना आर्थिक र राजनीतिक रूपले बोझ बनेको टिप्पणी गरेका छन्। यी संरचना हटाउनेबारे विचार गर्न पनि उनले आह्वान गरेका छन्। 
सामाजिक सञ्जालमा थापाले राष्ट्रिय सुरक्षाको अन्तिम किल्लाको रुपमा रहेको नेपाली सेनाको संख्या घटाउने निरर्थक बहस गर्नुको सट्टा देशलाई आर्थिक र राजनीतिक बोझ बनेको प्रदेशतहको संरचना हटाउनुपर्ने अभिव्यक्ति दिएका हुन्।
००००
त्रिभुवन विश्वविद्यालय समन्वय महाशाखाले अनुमति बिना अध्ययन तथा अनुसन्धान गरेको पाइए कारबाही गर्ने चेतावनी दिएको छ । 
महाशाखाले एक सूचना जारी गर्दै विश्वविद्यालयको स्थायी सेवामा रहेका शिक्षक तथा कर्मचारीहरूले शैक्षिक उपाधि प्राप्त हुने गरी थप अध्ययन तथा अनुसन्धान कार्य गर्नुपरेमा शिक्षाध्यक्षको कार्यालयबाट अनिवार्यरूपमा पूर्वस्वीकृति लिनुपर्ने स्पष्ट गरेको छ ।