सिम्रिक एयरको हेलिकप्टर संखुवासभामा दुर्घटना हुँदा १ जनाको मृत्यु भएको छ ।

अन्य ४ जना घाइते भएका छन् । घाइतेहरूको ललितपुरको भैसेपाटीस्थित नेपाल मेडिसिटी हस्पिटलमा उपचार भइरहेको छ ।

नेपाल नागरिक उड्डयन प्राधिकरणले शुक्रवार साँझ हेलिकप्टर दुर्घटनासम्बन्धी एक विज्ञप्ति जारी गर्दै सिम्रिक एयरको ९एन एजेजेड रजिष्ट्रेशन रहेको हेलिकप्टर अरुण तेस्रो जलविद्युतको सामग्रीसहित ४ जना यात्रु बोकेर गएको गएको बेला दुर्घटना भएको जानकारी दिएको छ ।

प्राधिकरणका अनुसार संखुवासभाको भोटखोला गाउँपालिका ४ सिप्रुङमा उक्त हेली दिउँसो १३ः०० बजे दुर्घटनामा परेको थियो । हेलिकप्टर दुर्घटनापछि नेपाली सेनाको १ तथा सिम्रिक एयरको १ गरी २ वटा हेलिकप्टरलाई उद्धार कार्यको लागि दुर्घटना स्थानतर्फ परिचालित गरिएको थियो ।

उक्त हेलिकप्टरमा रहेका वायुयान चालक १ सहित ५ जना थिए । त्यसमध्ये एक जना भविन गुरुङको मृत्यु भएको छ ।

हेलिकप्टरमा रहेका क्याप्टेन सुरेन्द्र पौडेलसमेत गम्भीर घाइते भएका छन् । अन्य ३ जना मनोज थापा, छिरिङ्ग भोटे र विक्रम शंकर घाइते भएका छन् ।

घाइते सबैको मेडिसिटी अस्पतालमा उपचार भइरहेको प्राधिकरणले जनाएको छ ।