राष्ट्रिय स्वतन्त्र पार्टीले तीन दलका शीर्ष नेताहरू बसेर नक्कली भुटानी शरणार्थी प्रकरण मिलाउने प्रयास भइरहेको हुनसक्ने आशंका व्यक्त गरेको छ । आइतवार साँझ सिंहदरबारमा बसेको पार्टीको संसदीय दलको बैठकले तीन दलका शीर्ष नेताहरू बैठक बसेर नक्कली शरणार्थी प्रकरण मिलेमतोमा सल्ट्याउने प्रयास गर्नु नहुने निस्कर्ष निकालेको प्रमुख सचेतक सन्तोष परियारले जानकारी दिए ।

उनका अनुसार संसदीय दलको बैठकमा भ्रष्टाचारको घटना मिलाउन तीन दलको बैठक बस्नु नहुने पनि स्पष्ट पारे । उनले आफ्नो पार्टी राजनीतिक लेनदेनमा नबस्ने भन्दै संसद् प्रभावकारी बनाउनुपर्ने बताए । 

भ्रष्टाचारमा अहिले भइरहेको छानबिनको विषयलाई पार्टीले समर्थन गर्ने तर यतिमा मात्रै खुसी हुने अवस्था नरहेको उनको भनाइ छ । 

नक्कली भुटानी शरणार्थी प्रकरणलाई तलमाथि हुन नदिन आफ्नो पार्टी लापिरेको उनले बताए । ‘उहाँहरू बस्न पाउनुहुन्छ । तर तीन दलका शीर्ष नेताहरू बसेर संसद्‍लाई बन्दी बनाउन पाइँदैन । संसद्‍बाट हुनुपर्ने काम कारवाही र निर्णय संसद्‍बाटै हुनुपर्छ,' उनले भने 'तर तीन दल कुनै न कुनै हिसाबले भुटानी शरणार्थी प्रकरणमा जोडिएका छन्, बाहिर आएको कुरा छ, त्यो घटना मिलाउन तीन दल बस्नु भएन । भ्रष्टाचारका मुद्दालाई मिलेमतोमा कमजोर बनाउन पाइँदैन ।’ 

प्रमुख सचेतक परियारले लोकतन्त्रलाई बलियो बनाउने र प्रभावकारी बनाउने हो भने सबै राजनीतिक पार्टीहरूलाई हैसियत अनुसारको समितिको नेतृत्व दिनुपर्ने स्पष्ट पारे ।