साइबर अपराधमा संलग्न एक युवकलाई प्रहरीले पक्राउ गरेको छ । पक्राउ पर्नेमा स्याङ्जाको पुतलीबजार नगरपालिका वडा नम्बर ३ स्थायी घर भई हाल  काठमाडौँको ठमेल बस्ने ४८ वर्षीय नन्दलाल शर्मा रहेका छन् । 

सामाजिक सञ्जाल फेसबुक मार्फत चिनजान भएर शर्माले एक महिलालाई हैरानी दिएको प्रहरीले जनाएको छ । पीडित महिलालाई बैंकहरू मार्फत ऋण मिलाइदिने भन्दै शर्मा सुरुमा नजिकिएका थिए ।  कुराकानीकै क्रममा उनले पीडितलाई मन पराउने र माया गर्ने भन्दै विश्वासमा पारेर सँगै बसेका तस्विरहरू गोप्य रूपमा खिच्ने तथा भिडियो समेत रेकर्ड गरेको प्रहरीले जनाएको छ । 

पछि सोही सोही तस्विर तथा भिडियो देखाउँदै  महिलासँग बार्गेनिङ सुरु गरेको साइबर ब्युरोले जनाएको छ । उनले ह्वाट्स एपमार्फत पीडितको आफन्त तथा साथी भाइलाई अश्लील तस्बिरहरूसमेत पठाएर चरित्र हत्या गरेको उजुरीका आधारमा ब्युरोले  पक्राउ गरेको हो । 

पोखराबाट पक्राउ परेका उनीविरुद्ध जिल्ला अदालत काठमाडौँबाट ५ दिन म्याद लिएर आवश्यक अनुसन्धान भइरहेको प्रहरी उपरीक्षक  पशुपति कुमार रायले जानकारी दिए ।