२२ असार २०८३, सोमबार
चर्चित रकस्टार तथा अभिनेता रोविन तामाङको निधनमा नेपाली कला क्षेत्र स्तब्ध बनेको छ । ६० वर्षीय उनको मंगलवार बेलुका बुढानिलकण्ठस्थित घरमा निधन भएको हो ।
गायक एवं अभिनेता तामाङको निधनको खबरसँगै उनका फ्यान एवं नेपाली सेलिब्रिटीहरू स्तब्ध बनेका हुन् ।
उनको निधनमा शुभचिन्तक, संगीतकर्मी, अभिनेता, फ्यानदेखि सांसदसम्मले श्रद्धासुमन व्यक्त गरिरहेका छन् । रकस्टार अभया सुब्बाले रोविनको निधनलाई एक युगको अन्त्य भएको बताएकी छन् । उनले रोविनलाई आफूले चिनेको सबैभन्दा राम्रो रकस्टार भएको बताएकी छिन् ।
हरिवंश आचार्य, सुनिल थापा, राजेशपायल राई, सविन राई, निमा रुम्बा, शिव परियार, दीपकराज गिरीलगायतका थुप्रै कलाकारले रोविनको निधनमा सामाजिक सञ्जालमार्फत श्रद्धाञ्जली व्यक्त गरिरहेका छन् । विभिन्न व्याण्डले पनि रोविनको निधनमा दुख व्यक्त गर्दै गरिरहेका छन् । राष्ट्रिय स्वतन्त्र पार्टीका सांसद असिम शाहले पनि रोविनको निधनमा शोक व्यक्त गरेका छन् ।
रोविन एण्ड द रिभोलुसन ब्याण्डका संस्थापक रहेका रोविनका ‘दम मारो दम’, ‘कल्पना’, ‘केटा केटी’, ‘मेरो माया’, ‘ठीकै छ’ जस्ता कयौं गीत युवापुस्तामाझ चर्चित छन् ।
उनी पछिल्लो समय नेपाली फिल्म अभिनयमा समेत व्यस्त थिए । उनको पछिल्लो फिल्म ‘छड्के २’ थियो । ‘छड्के’, ‘जय परशुराम’, ‘बादशाह जुट’, ‘चिसो एष्ट्रे’, मुखौटा’, ‘नाका’, ‘वान वे’, ‘दाल भात तरकारी’ लगायतका एक दर्जन बढी नेपाली फिल्ममा उनले अभिनय गरेका छन् ।
