३१ असार २०८३, बुधबार
काठमाडौं निर्वाचन क्षेत्र नम्बर ४ अन्तर्गत काठमाडौं महानगर र बूढानीलकण्ठ नगरपालिकाको सीमामा रहेको कपन खोलामा डोजर चलाउने विषयलाई लिएर विवाद भएको छ । बूढानीलकण्ठ तर्फका जनप्रतिनिधि र स्थानीयको विरोधपछि अहिले वार्ता शुरू भएको छ ।
काठमाडौं ४ का सांसद एवं कांग्रेस महामन्त्री गगन थापाको उपस्थितिमा बूढानीलकण्ठ नगरपालिकाको कार्यालयमा वार्ता चलिरहेको छ । यसअघि प्रहरी प्रभाग कपनमा भएको छलफल निष्कर्षमा पुग्न सकेको थिएन ।
वर्षातको समयमा बाढीले समस्या उत्पन्न गरेपछि काठमाडौं महानगरले खोला खन्न भन्दै बिहीवार बिहानदेखि डोजर परिचालन गरेको थियो । स्थानीयको विरोधपछि सम्भावित झडप रोक्न प्रहरीले डोजरको चाबी खोसेर लगेको छ ।
काठमाडौं महानगरको ६ र ७ तथा बूढानीलकण्ठको ९, १० र ११ वडाको सीमा रहेको खोला अतिक्रमण भएपछि हरेक वर्ष बाढीको समस्या आउने गरेको छ । खोला अतिक्रमण गरेर बाटो बनाइएको भन्दै महानगरले खोलामाथि राखिएको स्ल्याब भत्काउन लागेको हो ।
महानगरको टोली भने कुनै पनि हालतमा खोलामा डोजर चलाउने अडानमा छ । वार्तामा काठमाडौं महानगरका प्रतिनिधि सहभागी छन् । दलबलसहित महानगरको डोजर पुगेपछि सम्भावित झडप रोक्न ठूलो संख्यामा प्रहरी परिचालन गरिएको छ ।
