उपप्रधानमन्त्री एवं गृहमन्त्री नारायणकाजी श्रेष्ठले खेलाडीहरू राष्ट्रको गौरव भएको र खेलकुद क्षेत्रले राष्ट्रिय एकताको सन्देश दिने बताएका छन् ।

काजकिस्तानको अस्तानामा अगस्ट १८ देखि २७ सम्म आयोजना हुने ‘२२औं वर्ल्ड तेक्वान्दो प्रतियोगिता’मा भाग लिन जाने खेलाडीलाई सफलताको शुभकामना दिने क्रममा बुधवार गृह मन्त्रालयमा आयोजित संक्षिप्त बिदाइ समारोहमा उनले यस्तो बताएका हुन् ।

सरकारले आवश्यक नीति र योजना बनाएर खेल क्षेत्रलाई विशेष प्राथमिकता दिने पनि उपप्रधानमन्त्री श्रेष्ठले बताए । त्यसक्रममा उपस्थित खेलाडीले गृहमन्त्रीको भ्रष्टाचारविरोधी अभियानलाई ताली पिटेर स्वागत गर्दै यसले जनतामा आशा र उत्साह पलाएको बताएका थिए ।

तेक्वान्दोका खेलाडीहरू रुविका खड्का (तौल समूह ४७), सुस्मिता थापा (५२), पुकार केसी (६४) र अजय बुढामगर (७०) सम्मिलित टोलीमा अम्पायर अन्जन धमला, कोच रुपसिंह मोक्तान तथा ‘अफिसियल’ धनबहादुर थापा र विक्रम बुढामगर छन् । रुविका र सुस्मिता साफ प्रतियोगिताका ‘गोल्ड मेडलिस्ट’ समेत हुन् । ९३ देशका ९०० बढी खेलाडी प्रतियोगितामा सामेल हुने जनाइएको छ ।