इजरायलको गाजा क्षेत्रमा शनिबार भीषण आतंकवादी हमला भएको छ । हमलामा त्यहाँ कार्यरत ९ जना नेपाली घाइते भएको परराष्ट्र मन्त्रालयले जनाएको छ । 
मन्त्रालयका अनुसार घाइतेमध्ये २ जनाको अवस्था गम्भीर रहेको छ । नेपाल सरकारले  इजरायलमा आज भएको आतंकवादी हमलाको घोर भत्सर्ना गरेको छ । 

मन्त्रालयका अनुसार १४ जना नेपाली काम गरिरहेको एउटा फार्ममा पनि आक्रमण भएको हो । जसमा नौ जना नेपाली घाइते भएको र दुई जनाको अवस्था गम्भीर रहेको मन्त्रालयको विज्ञप्तिमा उल्लेख छ । 

इजरायलस्थित नेपाली दूतावासले आक्रमण प्रभावित क्षेत्रमा बसोबास गर्ने नेपालीहरूसँग निकट सम्पर्कमा रहेको जनाएको छ । नेपालीको सुरक्षा, सुरक्षा र उद्धारका साथै घाइतेको उपचारका लागि पनि दूतावासले इजरायली अधिकारीसँग सम्पर्क र समन्वय गरिरहेको छ ।
स्थितिलाई ध्यानमा राख्दै इजरायलमा रहेका नेपाली नागरिकहरूलाई सतर्क रहन मन्त्रालयले आग्रह गरेको छ ।