०७ साउन २०८३, बिहीबार
माओवादीले सशस्त्र जनयुद्ध शुरू गरेको दिन फागुन १ लाई सार्वजनिक बिदा दिने लगायत निर्णय फिर्ताको मागसहित प्रदर्शनमा उत्रिएका अधिकारकर्मीलाई प्रहरीले नियन्त्रणमा लिएको छ ।
मानव अधिकार तथा शान्ति समाजले शुक्रवार दिउँसो प्रधानमन्त्री कार्यालय सिंहदरबार अगाडि प्रदर्शन गरेको थियो ।
विस्तृत शान्ति सम्झौताको मर्म अनुरूप पीडितलाई न्याय र पीडकलाई सजाय सुनिश्चित गर्नुपर्ने, संक्रमणकालीन न्याय प्रक्रिया सम्बन्धी विधेयक मानव अधिकारमैत्री बनाउनु पर्ने लगायत माग राखी मानव अधिकारवादी नेता कृष्ण पहाडी लगायत धर्नामा बसेका थिए ।
फागुन १ गतेका लागि ‘जनयुद्ध दिवस’ का नाममा बिदा दिने निर्णय शिघ्र खारेज गर्नुपर्ने तथा कैद सजाय माफी गर्न सक्ने अधिकारको दुरुपयोग बन्द गर्नुपर्ने मागसहित उनीहरूले धनाए दिएका थिए ।
प्रदर्शन शुरू भएलगत्तै प्रहरीले समाजका संस्थापक सभापति कृष्ण पहाडी, सभापति रामकृष्ण बराल लगायत १६ जनालाई गिरफ्तार गरी प्रहरी वृत्त महानगर भृकुटीमण्डपमा राखेको छ ।
विस्तृत शान्ति सम्झौताको मर्म विपरीत मानव अधिकारको गम्भीर उल्लंघन कर्तालाई माफी दिने चलखेल भइरहेको भन्दै शान्ति समाजले आन्दोलन गरिरहेको छ ।
