२६ जेठ २०८३, मंगलबार
कम उमेरमै विश्व क्रिकेटमा प्रभाव छोडेका नेपालका लेग स्पीनर सन्दीप लामिछाने अर्को दुर्लभ विश्व कीर्तिमान निकट पुगेका छन् ।
यस अघि गत वैशाखमा कीर्तिपुरमा ओमानविरुद्ध एकदिवसीयमा सबैभन्दा छिटो ४२ खेलमा एक सय विकेट लिएर सन्दीपले विश्वकीर्तिमान आफ्नो नाममा लेखाएका थिए ।
विश्वकप एसिया छनोटको फाइनल खेलमा आगामी आइतवार कीर्तिपुरमा उही ओमानविरुद्ध सन्दीप फेरि टी–२० अन्तर्राष्ट्रियमा पनि सबैभन्दा छिटो एक सय विकेट लिने दुर्लभ कीर्तिमानको नजिक पुगेका हुन् ।
विश्वकप छनोटको निर्णायक र महत्वपूर्ण खेलमा सन्दीपले शुक्रवार यूएईविरुद्ध दुई विकेट लिएका थिए । सन्दीपले यी दुई विकेटसँगै ५१ खेलबाट विकेटको संख्या ९६ पुर्याएका छन् । अब आइतवार ओमानविरुद्ध सन्दीपले चार विकेट लिन सके ५२ खेलबाट एक सय विकेट पुर्याउने छन् ।
सन्दीपले यो लक्ष्य हासिल गरे यस अघि ५३ खेलबाट एक सय विकेट लिएका अफगानिस्तानका राशिद खानको कीर्तिमान तोडिनेछ ।
अब दुई खेलमा चार विकेट लिए सन्दीपले सबैभन्दा छिटो टी–२० एक सय विकेट लिनेमा राशिदसँग बराबरी गर्नेछन् ।
सन्दीपले ५३ खेलमा सबैभन्दा छिटो एक सय विकेट लिने कीतिमान आफ्नो नाममा लेखाउन नसके पनि दोस्रो स्थान भने पक्का गर्नेछन् । किनकि राशिदपछि श्रीलंकाका लाशिथ मालिंगाको नाममा दोस्रो कम ७६ खेलमा एक सय विकेट पूरा गर्ने दोस्रो खेलाडीको रेकर्ड छ ।
एक दिवसीयमा पनि सन्दीपले राशिदकै ४४ खेलको कीर्तिमान ४२ खेलमा पूरा गर्दै तोडेका थिए ।
नेपालले टी–२० विश्वकपमा स्थान पक्का गरेको निर्णायक खेलमा सन्दीपले ४ ओभरमा १ मेडन राख्दै १४ रन दिएर महत्वपूर्ण २ विकेट लिएका थिए । सन्दीपले ओमानविरुद्ध बिहीवार पनि कीर्तिपुरमा २ विकेट लिएका थिए ।
तर सन्दीपले यो प्रतियोगिता अघि नेपालले यूएई र हङकङसँग त्रिदेशीय सिरिज खेलेको थियो । यो सिरिज भने सन्दीपले खेलेका थिएनन् ।
यो सिरिजका ५ खेल खेलेको भए सन्दीपले सहजै विश्वकीर्तिमान आफ्नो नाममा लेखाउन सक्ने थिए ।
