नेपाली कांग्रेसका संघीय सांसदले १५ दिनको पारिश्रमिक जाजरकोट भूकम्पपीडितको राहत र उद्धारको लागि सहयोग गर्ने भएका छन् । ​

कांग्रेस संसदीय दल कार्यसमितिको बैठकले भूकम्प पीडितहरुको उद्धार, राहत र पुनर्स्थापनाका लागि संघीय संसद्‌मा आफ्नो पार्टीका तर्फबाट प्रतिनिधित्व गर्ने सदस्यहरूको १५ दिन बराबरको पारिश्रमिक रकम सहयोग स्वरूप नेपाल सरकारलाई उपलब्ध गराउने निर्णय गरेको हो ।

कात्तिक १७ गते शुक्रवार राति ११ः४७ बजे जाजरकोट जिल्लाको रामीडाँडा केन्द्रविन्दु भएर गएको ६.४ म्याग्निच्युडको भूकम्पका कारण जाजरकोट र रुकुम पश्चिमका विभिन्न क्षेत्रमा ठूलो संख्यामा मानवीय, भौतिक क्षति र सयौं घाइते भएको घटनाप्रति कांग्रेसले संसदीय दल कार्यसमितिले दुःख व्यक्त गरेको छ । 

बैठकले उक्त विनाशकारी भूकम्पमा परी जीवन गुमाउने प्रति श्रद्धाञ्जली अर्पण गर्नुका साथै शोकसन्तप्त परिवारजनमा गहिरो समवेदना व्यक्त गर्दै घाइतेहरूको शीघ्र स्वास्थ्य लाभको कामना गरेको छ । 

साथै कांग्रेसको भूकम्पपछि सहयोगको सहजीकरणको लागि महामन्त्रीद्वय गगन थापा र विश्वप्रकाश शर्माको संयोजकत्वमा सहजीकरण समिति गठन गरेको छ ।