‘लुट’बाट सेलिब्रिटी निर्देशकको छवि बनाएका निश्चल बस्नेत निर्देशित आगामी चलचित्र ‘दिमाग खराब’ यही शुक्रवारबाट प्रदर्शनमा आउँदैछ । 

तिहारको अवसर पारेर प्रदर्शनमा आउन लागेको चलचित्रमार्फत बस्नेतले झन्डै ७ वर्षपछि निर्देशनमा पुनरागमन गर्न लागेका छन् । 

यो चलचित्रलाई निकै प्रतीक्षित रुपमा हेरिएको छ ।

प्रचार सामग्रीलाई लिएर धेरैले यसलाई राजनीतिक चलचित्र भएको अनुमान गरेका छन् । निर्देशक बस्नेत भने यो राजनीतिक विषयवस्तुमा आधारित चलचित्र नभएको बताउँछन् । 

‘यो राजनीतिक चलचित्र होइन । एउटा साधारण मान्छेको कथा हो । साधारण मान्छेले आफ्नो जीवनमा के कस्ता कुराहरू भोग्दै जान्छ भन्ने कथा हो’ चलचित्रबारे जानकारी दिन राजधानीमा आयोजित कार्यक्रममा उनले भने – ‘एउटा व्यक्तिको भोगाइको वरिपरि परिवार छ । त्यो भन्दा बाहिरको लेयरमा समाज छ । समाजभन्दा माथि हाम्रो सिस्टम छ । एउटा मान्छे यी सबै कुराहरूसँग जोडिन्छ ।’ 

उनी हरेक मान्छेसँग राजनीति कुनै न कुनै रुपमा जोडिने बताउँछन् । हामीले सिधा रुपमा राजनीति नगरे पनि राजनीतिसँग चाहेर वा नचाहेरै पनि ठोक्किने गरेको उनको धारणा छ । 

बस्नेतले भने, ‘राजनीतिले कसरी हरेक व्यक्तिको जीवनमा असर पारिरहेको हुन्छ ? राजनीतिज्ञबाट कस्तो खालको समाधानको अपेक्षा गर्छौ ? उहाँहरूको कामलाई हामीले कसरी रियाक्ट गर्छौ ? भन्ने चलचित्रले देखाउँछ ।’

सामान्य मान्छेको संघर्षको कथा चलचित्रले पेस गर्ने उनले बताए । लामो तयारीपछि मेहनतका साथ चलचित्र बनाएको बताउँदै उनले दर्शकको मन जित्ने विश्वास व्यक्त गरे । 

‘दिमाग खराब’मा खगेन्द्र लामिछाने, दयाहाङ राई, स्वस्तिमा खड्का, अर्पण थापा, विजय बराल, सुमन कार्कीलगायतको अभिनय छ । 

चलचित्रको निर्माता रौनक विक्रम कंडेल हुन् । आकाश बरालले यसको कथा लेखेका हुन् ।