११ साउन २०८३, सोमबार
क्रिकेटर सन्दीप लामिछानेविरुद्ध बलात्कारको उजुरी दिएकी पीडित गौशाला– २६ (परिवर्तित नाम)ले आफ्ना तस्वीर सामाजिक सञ्जालमा हाल्नेविरुद्ध नेपाल प्रहरीको साइबर ब्युरोमा उजुरी दिएकी छिन् ।
उनले बिहीवार आफैँ उपस्थित भएर कारबाहीको माग गर्दै उजुरी दिएको ब्युरोका प्रहरी निरीक्षक (इन्सपेक्टर) राजकुमार खड्गीले लोकान्तरलाई जानकारी दिए ।
बलात्कार मुद्दामा लामिछाने दोषी ठहर भएर ८ वर्ष कैदको फैसला आएसँगै गौशाला २६ का तस्वीर नामसहित सामाजिक सञ्जालमा सार्वजनिक भएका थिए । यसो गर्नेहरूविरुद्ध कारबाहीको माग गर्दै पीडित प्रहरीकहाँ पुगेकी हुन् ।
पीडितका तस्वीर र नाम सामाजिक सञ्जालमा राख्नेहरूको खोजी कार्य शुरू भइसकेको इन्सपेक्टर खड्गीले बताए ।
यसैबीच, बिहीवार नै सामाजिक सञ्जाल प्रयोगमा संवेदनशील नरहेको भन्दै रवि लामिछाने नेतृत्वको राष्ट्रिय स्वतन्त्र पार्टी (रास्वपा)ले प्रवासी नेपाली सम्पर्क विभाग जापान च्युबू शाखा समितिका सदस्य दिवस सापकोटालाई निलम्बन गरेको थियो ।
उनलाई पदीय जिम्मेवारीबाट निलम्बन गरिएको रास्वपाले आफ्नो सामाजिक सञ्जालमा उल्लेख गरेको छ ।
गौशाला-२६ को तस्वीर सामाजिक सञ्जालमा पोस्ट गर्दै अदालती फैसलासँग जोडेर पीडितप्रति कटाक्ष गरेको आरोपमा सापकोटालाई निलम्बन गरिएको रास्वपाले जनाएको छ ।
बलात्कार प्रकरणमा क्रिकेटर लामिछानेलाई दोषी ठहर्याउँदै ८ वर्ष कैद सजायको फैसला काठमाडौं जिल्ला अदालतले गरेको छ । साथै पीडित युवतीलाई आरोपीको तर्फबाट ५ लाख जरिवाना र क्षतिपूर्ति भराउने पनि फैसला अदालतले गरेको छ ।
