अफ्रिका कप अफ नेसन्स फूटबल प्रतियोगिताको सेमिफाइनल समीकरण पूरा भएको छ । शनिवार राति अन्तिम क्वार्टरफाइनलमा दक्षिण अफ्रिकाले केप भेर्डेलाई पेनाल्टी सुटआउटमा २–१ गोल अन्तरले हराएसँगै अन्तिम ४ समीकरण पूरा भएको हो ।

यसअघि आयोजक आइभरी कोस्ट, नाइजेरिया र डीआर कंगो सेमिफाइनलमा पुगिसकेका थिए ।

आइभरी कोस्टले माली, नाइजेरियाले अंगोला र डीआर कंगोले गिनीलाई क्वार्टरफाइनलमा हराएका हुन् । 

अब फाइनल प्रवेशका लागि दक्षिण अफ्रिका​ले नाइजेरियाको सामना गर्नेछ । 

यस्तै आयोजक आइभरी कोस्टको प्रतिस्पर्धा डीआर कंगोसँग हुनेछ ।

सेमिफाइनलका दुवै खेल फेब्रुअरी ७ मा हुनेछन् । यी २ खेलका विजेताले फेब्रुअरी १० मा उपाधि भिडन्त गर्नेछन् ।

यो पटकको प्रतियोगितामा साविक विजेता सेनेगलसँगै सर्वाधिक विजेताहरू इजिप्ट, क्यामरुन र घानाजस्ता ठूला टोली क्वार्टरफाइनलमासमेत पुग्न सकेनन् । तर माली, अंगोला, केप भेर्डेजस्ता साना टोलीले अन्तिम ८ मा स्थान बनाएका थिए । 

डीआर कंगो अप्रत्यासित रुपमा सेमिफाइनलसम्म पुग्न सफल भएको छ ।