एकदिवसीय क्रिकेट​ सिरिजअन्तर्गत पहिलो खेलमा नेपाल ‘ए’ले क्यानडा–११ लाई २१७ रनको मध्यम लक्ष्य दिएको छ ।

मूलपानी क्रिकेट मैदानमा आइतवार जारी खेलमा टस हारेर पहिले ब्याटिङको निम्तो पाएको नेपालले निर्धारित ५० ओभरमा ८ विकेट गुमाएर २१६ रन बनाएको छ ।

नेपालका लागि बसिर अहमदले अर्धशतकीय पारी खेल्दै सर्वाधिक ५० रन जोडे । यस्तै तेस्रो नम्बरमा ब्याटिङ गर्न आएका राशिद खानले ४० रन बनाए ।

अविजित रहेका बसिरले ५५ बलमा ३ चौका र १ छक्का प्रहार गरेका थिए । 

यस्तै मायन यादव ३५, सन्दीप जोरा १४, किरण ठगुन्ना २५, विवेक यादव २१, कप्तान विनोद भण्डारी ५, प्रतिश जीसी र अर्जुन कुमाल ४–४ रन बनाएर आउट भए । शाहव आलम २ रनमा अविजित रहे । 

बलिङमा क्यानडाका कप्तान साद बिन जफरले सर्वाधिक ३ विकेट लिए ।

तीन खेलको एकदिवसीय अभ्यास खेलअन्तर्गत नेपाल ‘ए’ले क्यानडा–११ को सामना गरिरहेको हो ।

प्रधानमन्त्री कप, यू–१९ विश्वकप र नेपालको सिनियर राष्ट्रिय टोली नपरेका खेलाडीहरू नेपाल ‘ए’मा समावेश छन् ।

यो अभ्यास खेल सिनियर टोलीमा पर्ने ढोका ढक्ढक्याउने अवसर पनि हो ।

दुई सातापछि यूएईमा आईसीसी विश्वकप लिग–२ त्रिकोणात्मक सिरिज खेल्न जानुअघि क्यानडाले नेपालमा अभ्यास खेल खेलेको हो । क्यानडाले नेपालसँग यसै साता तीन एकदिवसीय खेल हारेको थियो ।