बुधवार बिहान करिब ७ देखि ८ बजेबीचमा काठमाडौंको सीतापाइलामा हृदयबिदारक घटना भयो । सोलुखुम्बु निवासी काजी भनिने राजु घिमिरेले नार्गाजुन नगरपालिका–६ भैरव टोलमा आफ्नै परिवारका ३ जनाको हत्या गरे । उनले आफ्नी श्रीमती ३९ वर्षीया ईश्वरी श्रेष्ठ (विक), ८ वर्षीया छोरी अनिशा र २ वर्षीया नातिनी सिवानाको सामुहिक हत्या गरेका हुन् । हत्यापछि उनले पनि आत्महत्या गरेका छन् ।

अचम्म त के छ भने हत्यापछि काजी आफैँले ससुरा इन्द्रजीत श्रेष्ठलाई फोन गरेर घटनाबारे जानकारी गराएका थिए । यहाँसम्मकी आफू नै ‘हत्यारा हुँ’ भनेर !

‘उसले मैले श्रीमती, छोरी र नातिनी मारेँ, जे गर्ने हो गर है भनेर फोन काट्यो,’ इन्द्रजीतले लोकान्तरसँगको कुराकानीमा भने ।  यसलगत्तै इन्द्रजीतले प्रहरीलाई खबर गरे । उनी काजी बसेको घरतर्फ हतारिँदै लागे । 

परिवारका ३ सदस्यको हत्या गर्नुअघि काजीले आफ्ना १४ वर्षीय छोरा अनिशलाई तरकारी किन्नका लागि भन्दै बिहान सीतापाइला चौकमा पठाएका थिए ।  साथै हत्याको भिडियोसमेत बनाएका रहेछन् । ‘चोकैको पसलमा गएर सामान ल्याएस् भन्दै उसले छोरालाई पठाएको पाइएको छ,’ ससुरा इन्द्रजीतले थपे, ‘उसले हत्याको भिडियो बनाएर मलगायत सालो (मेरो छोरो) सासु (मेरी श्रीमती) र उसकै छोरा अनिशलाई पनि पठाएको रहेछ ।’ 

ससुरा इन्द्रजीतका अनुसार काजीले हत्यापछि छोरा अनिश बाटोमा भेटेर आफूले आमा, बहिनी र भतिजीको हत्या गरेको बताएका थिए ।

काजीको परिवार भैरव टोलमा फ्ल्याट भाडामा लिएर बस्ने गरेका थिए । त्यहाँ उनीहरूका ६ जना सदस्य बस्दै आएको घरबेटीले बताए । मृतक ४ जना, १५ वर्षीय छोरा अनिस र काजीकी बुहारी बस्दै आएका थिए । संयोवश बुहारी भने बिहानै काम गर्न बाहिर निस्केकी थिइन् । यसकारण उनको भने ज्यान बचेको छ । 

आरोपी काजीका एक छोरा विदेशमा वैदेशिक रोजगारीमा रहेका छन् । आफन्त सुनीता राई (मृतक ईश्वरीकी फुपू)का अनुसार ईश्वरीले काजीसँग दोस्रो विवाह गरेकी थिइन् । काजीसँग विवाह गर्दा उनले छोरा पनि साथमै लिएर आएकी थिइन् । ‘यो सानी नानी जेठो छोरो पट्टीकी हो । भतिजीले यहाँ आउँदा लिएर आएकी थिइ,’ सुनीताले लोकान्तरसँग भनिन् । 

घटना भएको थाहा पाएपछि प्रहरी वृत्तको टोली बुधवार बिहानै घटनास्थलमा पुग्यो । घटनास्थलमा सँगसँगै अपराध अनुसन्धान कार्यालयको टोली पनि पुगिसकेको थियो । हत्यापछि काजी माथि जङ्गलतर्फ लागेको जानकारी स्थानीयहरूले दिएपछि अपराध महाशाखाको टोली उनलाई खोज्नतर्फ लाग्यो । यता वृत्तको टोली घटनाको मुचुल्का लगायतका कामतर्फ लागिसकेको थियो । 

महाशाखाको टोली भने अपराधी भाग्ने डरले उनको खोजीमा लागेको थियो । टोलीले प्राविधिक अनुसन्धान गर्दा काजीको फोनको लोकेसन करिब ९ बजेतिर नागार्जुनको जङ्गलमा देखिएको थियो । ‘हत्यापछि अपराधी भाग्छ भन्ने लागेर हामीले टेक्निकल अनुसन्धान गर्दा जङ्गलमा देखिएपछि खोज्दै त्यहाँसम्म गएका थियौं,’ अनुसन्धानमा खटिएका एक अधिकारीले लोकान्तरसँग भने ।

उनको खोजीका लागि अपराध महाशाखाका प्रमुख प्रहरी वरिष्ठ उपरीक्षक (एसएसपी) सोमेन्द्रसिंह राठोरसहितको टोली जङ्गलतर्फ लागेको थियो । त्यो टोलीले काजीलाई खोज्दै नार्गाजुनको जङ्गलसम्म पुग्यो । सो क्रममा उनी सल्लाको रुखमा झुण्डिएको अवस्थामा भेटिए । 

लोकान्तरको टीम पनि प्रहरीसँगै पुगेको थियो । त्यहाँ पुग्दा पहेँलो हुडी लगाएका काजीले पहेँलै डोरी घाँटीमा बाँधेर आत्महत्या गरेका थिए । 

उनलाई फेला पारेर फर्किँदै गर्दा एसएसपी राठोरले काजी केही समयअघिसम्म जिउँदै रहेको तर १ घण्टाको बीचमा उनको मृत्यु भएको बताए । ‘सही तथ्य त पोस्टमार्टमले ल्याउँला । तर १ घण्टा (बिहान करिब ११ बजे) अगाडिसम्म उ जिउँदै थियो,’ एसएसपी राठोरले भने । 

त्यसपछि प्रहरी वृत स्वयम्भूको टोली पुगेपछि महाशाखाको टोली त्यहाँबाट फर्किएको थियो । 

विवाहेत्तर सम्बन्धको आशंका

घरवेटी बद्री बजगाईंका अनुसार काजीको परिवार बाहिरबाट हेर्दा निकै खुशी देखिन्थ्यो । उनको घरमा एक वर्षदेखि बस्दै आएका उनीहरू कहिल्यै झगडा गरेको र ठाडाे स्वर गरेको सुनिएको थिएन ।

यतिसम्मकी घटनाको १ दिनअघि मंगलबार बेलुका ससुरा इन्द्रजीत श्रेष्ठ र काजीसहित परिवार सँगै बसेर खाजा खाएका थिए । त्यसपछि उनले ससुरालीमा सामान पनि पुर्याएका थिए । ‘हिजो हामीसँगै थियौं । त्यो मेरी अर्की छोरीको घरमा पूजा भएकाले सँगै सामान लिएर आएका थियौं,’ इन्द्रजीतले लोकान्तरसँग भने । उनका अनुसार काजीले नातिनीलाई निकै माया गर्थे । 

१ वर्षअघिसम्म कलंकीको खसीबजारमा खाजा पसल सञ्चालन गर्दै आएका थिए । आफन्तहरूका अनुसार काजीले त्यो पसल के कारणले बन्द गरे भन्ने कुरा खुलेको छैन ।  प्रहरीको प्रारम्भिक अनुसन्धानमा काजी र ईश्वरीबीचको सम्बन्धमा तेस्रो केटाको प्रवेश भएका कारण उनीहरूबीच खटपट भएको देखिएको छ । 

‘ईश्वरीको मोबाइलमा अर्कैसँग च्याट भएको देखिन्छ । त्यसले पनि ईश्वरीको अर्कैसँगको सम्बन्धका कारणले यस्तो घटना भएको हुनसक्ने अनुमान अहिलेको हो,’ अनुसन्धानमा खटिएका एक अधिकारीले लोकान्तरसँग भने । 

प्रहरीले अहिले सबै जनाको शव पोस्टमार्टमका लागि त्रिभुवन विश्वविद्यालय शिक्षण अस्पताल, महाराजगञ्ज लगेको छ ।