जनमत पार्टीका अध्यक्ष एवं सांसद डा सीके राउतले सत्ता गठबन्धनको पटकपटकको प्रयासको बहसभन्दा एलिना चौहानको गीत उचित हुने बताएका छन् ।

प्रधानमन्त्रीले विश्वासको मत लिने छलफलमा भाग लिँदै राउतले गठबन्धन ठीक छ र छैन भन्ने बहसभन्दा एलिनाको गीत उचित हुने बताएका हुन् । 

‘आज हामी प्रधानमन्त्रीले विश्वासको मत लिने छलफलमा छौं । मत दिने कि नदिने छलफलमा छौं । सोहीक्रममा हामीले सबै दलका कुराहरू सुन्यौं । त्यो घण्टौंसम्म यस्तो सुन्नुभन्दा बरु एलिना चौहानको गीत लगाइदिएको भए हुन्थ्यो’, उनले भने, ‘गठबन्धन पटकपटक बन्छ, भत्किन्छ । जनताले के लाभ पाएको भन्नेतिर लाग्नुपर्ने हो ।’

एलिनाले गाएको 'धाेकेवाज हौ तिमी’ भन्ने गीततिर राउतले लक्षित गरेका थिए । 

यस्तै उनले गठबन्धन घातक भएको भन्दै यसलाई शंसोधन गर्नुपर्ने उनले बताए ।

'समस्या बताउनभन्दा समाधानमा जान चाहन्छु । दुई तीन प्रवृत्ति देखिएको छ । निर्वाचनमा गठबन्धन कति घातक छ हामीले देखेका छौं । छातीमा छर्रा भएकोले बुर्जुवालाई भोट हाल्नुपरेको छ । जसले हत्या गरेको छन् उसलाई भोट दिनुपरेको छ’, राउतले भने, ‘भोट हाल्ने प्रवृत्ति रोक्ने, ऐन कानून परिवर्तन गर्ने वा यो व्यवस्था नै परिवर्तन गर्नेतिर लाग्नुपर्छ । के कारणले भोट हाल्ने ? जनताले नै प्रत्यक्ष भोट हाल्ने र निर्वाचित गर्ने प्रबन्ध गरौं ।’