प्रधानमन्त्री पुष्पकमल दाहाल प्रचण्डले उपप्रधान तथा गृहमन्त्री रवि लामिछाने सहकारी ठगीमा संलग्न रहेको प्रमाण फेला नपरेको बताएका छन् । रविविरुद्ध पोखराको सूर्यदर्शन सहकारीका पीडितले पूरक उजुरी दिए पनि त्यसमा प्रमाण नभएको उनले बताए । 

मंगलवार प्रतिनिधि सभा बैठकलाई सम्बोधन गर्दै प्रचण्डले अनुसन्धान गर्ने निकायले अहिलेसम्म रविले सहकारी ठगी गरेको प्रमाण फेला नपरेको बताएका हुन् ।

अनुसन्धानमा कैफियत देखिएमा कारवाही गर्ने प्रतिबद्धता प्रचण्डले जनाए । ‘विगतमा पनि मिडिया ट्रायल हुँदै आएको थियो, सत्यता कति गम्भीर हो भनेर हेर्ने स्थिति बनेको थिएन । कांग्रेसले यति गम्भीर रूपले उठाएपछि आफैंले खोजबिन गरें, सम्बन्धित सरकारी निकायको रिर्पोट अध्ययन गर्ने कोसिस गरें’ प्रचण्डले भने, ‘हालसम्मको अनुसन्धानले सहकारीको कुनै पनि जिम्मेवारी र भूमिकामा नरहेको र अदालतको विचाराधीन मुद्दामा जोडिएको देखिएको छैन । रकम हिनामिना गरेको भन्दै गरेको जाहेरी दरखास्तमा कसैको नाम किटिएको थिएन । सहकारीको रकम हिनामिनामा १९ जनालाई कास्की जिल्ला अदालतमा मुद्दा दायर गरिएको छ । ४ जना पक्राउ परेका छन्, बाँकीको खोजी । मूल उजुरी परेको ६ महिनापछि माघ २२ गते पूरक जाहेरी दिइएको छ । रवि लामिछाने सहकारी हिनामिनामा संलग्न रहेको कुनै आधार र प्रमाण पेश गरिएको छैन ।’ 

आधार प्रमाणविनाको उजुरी दायर भएको प्रचण्डले बताए । रविको नाममा गएको ऋण फर्स्यौट भइसकेको समेत उनले दाबी गरे । ‘रवि लामिछानेको पार्टी सरकारमा सहभागी भएपछि संसद्‌को नियमित काम कारवाही प्रभावित हुनेगरी उठाउनु स्वय प्रतिपक्षी दलका सदस्यले बुझ्नु पर्ने विषय हो’ उनले भने, ‘अनुसन्धान प्रभावित गर्ने भए अर्को मन्त्रालयमा गए पनि हुन्छ ।’