गत सोमवार होली खेल्ने क्रममा केलालीको चिसापानीस्थित कर्णाली नदीको पुलबाट फाल हानेर नदीमा बेपत्ता भएका युवा लोकेन्द्र शाहीको शव भेटिएको छ । उनको शव चार दिनपछि बिहीवार फेला परेको हो ।

टीकापुर नगरपालिका–२ को सन्कट्टी घाटमा शाहीको शव फेला परेको जिल्ला प्रहरी कार्यालयका प्रवक्ता प्रहरी नायब उपरीक्षक कुलदीप चन्दले लोकान्तरलाई जानकारी दिए ।

सोमवार दिउँसो कर्णाली पुलबाट हाम फालेका १७ जनामध्ये शाही मात्र नदीमा डुबेर बेपत्ता भएका थिए । हाम फाल्ने अन्य व्यक्ति पौडी खेलेर बाहिर निस्केका थिए । पुलबाट हाफ फाल्नुअघि उनीहरूले चिसापानीमा मदिरा सेवन गरेको खुलेको प्रहरीले जनाएको छ ।

प्रहरीका अनुसार पुलबाट कर्णालीमा हाम फाल्ने सबैजनाले शरीरको माथिल्लो भागको लुगा फुकालेका थिए । प्रहरीले उनीहरूलाई रोक्न खोजे पनि सामूहिक तस्वीर खिच्ने भन्दै चिसापानी बजारबाट पुलतर्फ निस्किएका थिए । 

उक्त घटनाबारे अनुसन्धान गर्न प्रहरीले पुलबाट हाम फाल्ने आठ जनालाई नियन्त्रणमा लिएर सोधपुछ गरेको थियो । सोधपुछका क्रममा नियन्त्रणमा लिएका एक जनाले त्यो दिन हाम फाल्ने कुनै पनि योजना नभएको बयान दिएका छन् । 

कर्णालीमा हाम फाल्नेहरू १७ देखि ४० वर्षसम्मका हुन् । उनीहरू होली खेल्दै चिसापानी बजार पुगेका थिए ।

मृत भेटिएका ३० वर्षीय शाही चिसापानीकै स्थानीय हुन् ।   

होली मनाएर रमाइलो गर्दै १७ जनाले कर्णालीमा फाल हाने, एक युवा बेपत्ता