१० साउन २०८३, आइतबार
‘स्ट्रिप च्याट’मार्फत बालबालिकाहरुलाई अश्लील यौनजन्य क्रियाकलापमा संलग्न गराएको आरोपमा प्रहरीले सिन्धुपाल्चोक पाँचपोखरीकी अञ्जली अधिकारीलाई पक्राउ गरेको छ ।
आर्थिक हिसाबले विपन्न परिवारका बालबालिकाहरूलाई आर्थिक प्रलोभनमा पारी ‘अनलाइन टाइपिङ’को रोजगारी दिलाइदिने नाममा अधिकारीले अश्लील कार्य गर्न लगाएको प्रहरीको आरोप छ ।
काठमाडौं उपत्यका अपराध अनुसन्धान कार्यालयका प्रवक्ता एसपी रवीन्द्र रेग्मीका अनुसार अधिकारीले सामाजिक सञ्जालमा ‘स्ट्रिप च्याट : फ्रि लाइभ सेक्स क्याम्स एण्ड एडल्ट च्याट विथ न्याकेड गर्ल्स’ नामको एकाउन्ट खोलेर लाइभ भिडियो च्याटमा बस्दै आएकी थिइन् ।
‘च्याटमा आएका बालबालिकाहरुसँग अधिकारीले अश्लील कुराकानी गर्न लगाउने, बढी आम्दानी गर्नको लागि शरीरको कपडा खोल्न लगाउने र यौनाङ्ग देखाउनुपर्ने भन्दै आएकी रहिछिन्', रेग्मीले भने, ‘यौनाङ्ग प्रदर्शन गरेपछि त्यो भिडियोलाई अश्लील सामग्रीको रुपमा प्रयोग गर्ने गरेको देखियो ।’
अनुसन्धान कार्यालयले अधिकारीलाई गोकर्णेश्वर नगरपालिका–माकलबारीबाट नियन्त्रणमा लिएको हो ।
१९ वर्षीया अधिकारीविरुद्ध बालबालिकासम्बन्धी ऐन २०७५ को परिच्छेद ८ को दफा ३ बमोजिमको कसुरमा कारबाहीको लागि प्रहरी परिसर टेकुमा पठाइएको जानकारी रेग्मीले दिए ।
