सरकारले राष्ट्रिय प्रतिरक्षा विश्वविद्यालय यथासिघ्र सञ्चालन गर्ने निर्णय गरेको छ ।

राष्ट्रपति रामचन्द्र पौडेलले मंगलबार संसद्मा सरकारको नीति तथा कार्यक्रम प्रस्तुत गर्दै यसको जानकारी दिएका हुन् ।

‘राष्ट्रका लागि आवश्यक सुरक्षा तथा प्रतिरक्षा सामग्री अत्यावश्यक गोलीगठ्ठा र विष्फोटक पदार्थ लत्ताकपडालगायत अन्य सैन्य सामग्री उत्पादनमा आत्मनिर्भरता हुँदै जाने नीति लिइने छ,’ उनले भने, ‘मुलुकको सुरक्षा प्रतिरक्षा र अन्तर्राष्ट्रिय सम्बन्धका विषयमा साझा बुझाइ र समान धारणाको विकास गर्दै यी विषयमा उच्चस्तरीय अध्ययन अनुसन्धान र प्राज्ञिक विमर्शलाई प्रबर्द्धन गर्न राष्ट्रिय प्रतिरक्षा विश्वविद्यालय यथासिघ्र सञ्चालन गरिने छ ।’

यस्तै राष्ट्रिय सुरक्षा नीति एवं कार्ययोजनाका आधारमा राष्ट्रिय सुरक्षा प्रणाली सुदृढ गरिने पनि सरकारले नीति लिएको छ ।

‘नेपालको सार्वभौमसत्ता, स्वतन्त्रता, भौगोलिक अखण्डता, राष्ट्रिय एकता एवं राष्ट्रियहीत र स्वार्थ रक्षाका लागि नेपाली सेनालगायत सबै सुरक्षा निकायको क्षमता अभिवृद्धि गरिने छ,’ उनले भने, ‘नेपाली सेनाको बंकरदेखि ब्यारेक कार्यक्रम तथा भूकम्पबाट क्षतिग्रस्त संरचनाहरूको पुनर्निर्माण कार्यलाई निरन्तरता दिइनेछ ।’