अख्तियार दुरुपयोग अनुसन्धान आयोगले विशेष अदालतको फैसलाविरुद्ध सर्वोच्च अदालतमा पुनरावेदन मुद्दा दर्ता गरेको छ ।

विशेषले गरेको फैसलामा आयोगलाई चित्त नबुझी शुक्रबार सर्वोच्चमा पुनरावेदन मुद्दा दर्ता गरिएको आयोगले जनाएको छ ।

आयोगका प्रवक्ता नरहरि घिमिरेका अनुसार गैरकानूनी रूपमा सम्पत्ति आर्जन गरी भ्रष्टाचार गरेको मुद्दामा विशेषले आंशिक दाबी पुग्ने फैसला गरेको थियो । विशेषको सोही फैसलाविरुद्ध आयोग सर्वोच्च पुगेको हो ।​

गैरकानूनी रूपमा सम्पत्ति आर्जन गरी भ्रष्टाचार गरेको आरोपमा आयोगले ऋषिराम अर्याल, लक्ष्मीदेवी उपाध्याय अर्याल, सुशील अर्याल र सुनिल अर्याललाई प्रतिवादी बनाएर अभियोग पत्र दायर गरेको थियो ।

प्रतिवादी ऋषिराम अर्यालले सार्वजनिक सेवा प्रवेश गरेको मिति २०३५ असोज ३ गतेदेखि २०७६ असार मसान्तसम्मको जाँच अवधिमा वैध आय आर्जन ८ करोड ७७ लाख २७ हजार ४८३ रुपैयाँ रहेको पाइएको थियो ।

यस्तै, सही अवधिमा विभिन्न शीर्षकमा गरिएका लगानी तथा खर्च २६ करोड ६० लाख ६९ हजार ६२ रुपैयाँ रहेको पाइएको आयोगले जनाएको छ ।

यसरी उनको आम्दानी र  खर्चको लेखा-जोखा गर्दा १७ करोड ८३ लाख ४१ हजार ५७९ रुपैयाँ स्रोत नखुलेको आयोगले जनाएको थियो ।