नेकपा (माओवादी केन्द्र)ले आसन्न २०८४ को चुनाव एक्लै लड्ने निर्णय गरेको छ । चार दिनसम्म चलेको पदाधिकारी बैठककाे अन्तिम दिन मंगलवार प्रवक्ता अग्निप्रसाद सापकोटाले पार्टीका विचार जनतासँग सोझै पुगोस् भन्ने हेतुले अर्को चुनाव एक्लै लड्ने गरी अगाडि बढ्ने निर्णय गरिएको बताए ।  

‘हाम्रो सरकारले शुरू गरेका सामाजिक न्यायका मुद्दालाई गम्भीरतापूर्वक उठाउने ,भ्रष्टाचारविरोधी अभियानलाई अगाडि बढाउने र एक्लै चुनाव लड्ने गरी तयारी गर्ने विषयमा हामीले निर्णय गरेका छौं,’ बैठकपछि उनले भने, ‘जसले गर्दा हाम्रा विचार राजनीतिक कार्यदिशा, जनतामा सोझै पुग्न सकोस् । गठबन्धन गर्दा त्यहाँभित्रका अरु पार्टीका राजनीतिक दृष्टिकोणको पनि कुरा गर्नुपर्ने हुन्छ । यसैले यो आफ्नै कुरा लाने सुवर्ण अवसर पनि हो ।’

जनतासँग टुटेको सम्बन्ध स्थापित गर्न उनीहरूबीच नै जाने निर्णय गर्नुपरेको प्रवक्ता सापकोटाले बताए । 

‘हामो वर्गसितको सम्बन्ध खुकुलो हुन पुग्यो । कडी टुटेकोजस्तो भएको छ, जनताका सुखदुःख नजोडिएकोजस्तो देखिएपछि जनतामा जाने निर्णय गरेका हौं,’ उनले भने । 

समापन बैठकमा अध्यक्ष पुष्पकमल दाहाल प्रचण्डले पनि जनतासँगको कडी टुटेको भन्दै अब आफू सुखदुःख बुझ्न निस्कने बताए । 

‘जनतासँगको सम्बन्धको कडी टुटेको छ । एकपटक जनतासँग एकाकार हुन मन छ । सुखुदुःखका कुरा सुन्न देशैभर जान मन छ भन्नुभएको छ,’ सापकोटाले भने, ‘यो कार्यक्रम केन्द्रीय समितिको बैठकपछि हुन्छ । उहाँले जोड दिएर म एकपल्ट देशव्यापी जनताको माझमा जान्छु । जनताको कुरा सुनेपछि विचार संश्लेषणतिर जान्छु भन्नभएको छ ।’

कम्युनिस्ट एकता गर्ने र धेरै अगाडिसम्म जाने गरी नेकपा (एमाले)सँग मिलेर सरकार बनाए पनि धोका पाएको माओवादीको भनाइ छ । 

‘पहिलो समीकरणमा धेरै ठूलो अवसर थियो । कम्युनिस्ट पार्टीबीच एकता भएपछि धेरै अगाडिसम्म जान सकिन्छ भन्ने थियो । त्यो रक्षा गर्न गर्न सकेनौं । एमालेले नै त्यो समीकरण तोड्ने काम गर्यो,’ उनले भने, ‘एमाले हामीसँगको सरकार तोडेर नेपाली कांग्रेससँग मिसिन पुग्यो । हामी अब लोकतान्त्रिक समाजवादउन्मुख राज्यव्यवस्थाका लागि अग्रगामी शक्तिसँग मोर्चालाई बलियो बनाउन लाग्छौं ।’

माओवादीले कम्युनिस्ट पार्टीको पुनर्गठनका लागि निरन्तर प्रयत्न गर्ने पनि बताएको छ । 

मोर्चालाई बलियो बनाएर कम्युनिस्ट पार्टीको पुनर्गठन गर्ने पनि माओवादीले जनाएको छ । 

माओवादीका योजना र कार्यक्रम स्थायी समिति र केन्द्रीय कमिटीले बनाउने प्रवक्ता सापकोटाले जानकारी दिए । यसका लागि साउन २५ गते बस्ने गरी स्थायी कमिटीको बैठक बोलाएको पनि उनले जनाए ।