०८ साउन २०८३, शुक्रबार
निजी क्षेत्रको लगानीमा बुटवलमा निर्माण भएको पाँच तारे होटल सफ्रोन सीके प्रालि सञ्चालनको अन्तिम तयारीमा जुटेको छ ।
यस क्षेत्रका प्रतिष्ठित उद्योगीहरूको लगानीमा निर्माण भएको होटल अबको केही महिनाभित्र सञ्चालनमा आउनेछ ।
सफ्रोन सीके बुटवलको पहिलो र रुपन्देहीको पाँचौं पाँच तारे होटल हो ।
सञ्चालक भूमिराज पौडेलले होटलको भौतिक निर्माणको काम करिब सकिएको लोकान्तरलाई जानकारी दिए ।
‘होटल बुटवल अन्तर्राष्ट्रिय सम्मेलन केन्द्रको अगाडि रहेको छ,’ सञ्चालक भूमिराज भन्छन्, ‘सम्मेलन केन्द्रमा ठूला सभा सम्मेलन हुँदा त्यसको अगाडि रहेको फाइभ स्टार होटलमा बस्न पर्यटकहरूलाई सहज हुनेछ । होटलबाट भैरहवास्थित अन्तर्राष्ट्रिय विमानस्थलमा पुग्न २४ किलोमिटरको दूरी छ ।’
होटलको लगानी जग्गासहित ४ अर्ब रुपैयाँ रहेको सञ्चालक भूमिराजले जानकारी दिए ।
होटलबाट नेपाल–भारत सीमा पुग्न २६ किलोमिटर दुरी रहेको छ । होटल बुटवल उपमहानगरपालिका वडा नम्बर ८ सुख्खानगरमा पर्छ ।
होटलको अगाडि १० हजार दर्शक क्षमताको अन्तर्राष्ट्रिय प्रदर्शनी केन्द्र र ३ हजार क्षमताको बुटवल अन्तर्राष्ट्रिय सम्मेलन केन्द्र (बीआईसीसी) छन् । ५ हजार ५७४६ वर्गमिटरमा फैलिएको होटलमा १०७ वटा कोठाहरू रहेका छन् ।
पाँच तारे होटलमा रेस्टुरेन्ट, स्विमिङ पुल, सम्मेलन र ब्याङकेट हल, क्यासिनो, स्पा र अन्य सुविधाहरू रहनेछन् । होटल सञ्चालकमा चुन्नुप्रसाद पौडेल, कमलकिशोर मालपानी, नरिश्वर पौडेल, उमाशंकर मालपानी, भूमिराज पौडल र श्रवण बेरिवाल रहेका छन् । होटल एक विगाहा ६ कठ्ठा क्षेत्रफलमा फैलिएको छ ।
३६ हजार स्क्वायरफूटमा क्यासिनो निर्माण कार्य जारी छ । होटल व्यवस्थापनको जिम्मा होटल ह्यात प्रालिले लिने गरी सम्झौता गरिएको छ ।
होटल सफ्रोन सीकेका अध्यक्ष चुन्नु पौडेलले होटलले बुटवलको पर्यटन क्षेत्रमा ठूलो टेवा पुर्याउने अपेक्षा लिइएको बताए ।
‘होटल म्यानेजमेन्टको जिम्मा विश्वस्तरमा ख्याती कमाएको ह्यात ग्रुपले लिएको छ,’ पौडेलले लोकान्तरसँग भने, ‘बुटवल–नारायणगढ सडक बनेपछि र भैरहवाको विमानस्थल राम्रोसँग चलेपछि सिफ्रोन सीके होटलले यस क्षेत्रको विकासमा एउटा इँट्टा थप्ने अपेक्षा हामीले लिएका छौं । क्यासिनो पनि अबको एक वर्षभित्र पूर्णरूपमा सञ्चालनमा आउनेछ ।’
होटलमा ब्यांकेट हल र सेमिनार हल ४ वटा रहेका छन् । फाइभ स्टारको सबै मापदण्ड पूरा गरेर फूलफेजमा सञ्चालनमा ल्याउने पौडेलको भनाइ छ ।
दुई वर्षअघि २०७९ भित्रै सञ्चालनमा ल्याउने गरी निर्माण थालिए पनि कोरोना महामारीजस्ता अप्ठ्याराले निर्माणमा ढिलाइ भएको थियो ।
रुपन्देहीमा विमानस्थललाई लक्षित गरेर अर्बौं लगानीका होटल खुल्ने क्रम जारी छ । सिद्धार्थ होटल संघ (सान) का अध्यक्ष चन्द्रप्रकाश श्रेष्ठ (सीपी) ले रुपन्देहीमा फाइभ स्टार होटल थपिने क्रम जारी रहेको बताए ।
रुपन्देहीको पहिलो पाँच तारे होटल भने टाइगर प्यालेस रिसोर्ट हो । लुम्बिनीमा गोल्यान गु्रुपले पनि फाइभ स्टार होटल बनाउने तयारी गरेको छ ।
त्यस्तै, भैरहवाको बुद्धचोकमा पनि फाइभ स्टार होटल निर्माण जारी छ ।
रुपन्देहीका सबैजसो स्तरीय होटलको प्रमुख टार्गेट भारतीय पर्यटक हुन् । होटल सञ्चालनमा एशोदा फूडस् प्रालिको टीम रहेको छ ।
