गएराति कैलाली र बारालगायत क्षेत्रमा भारी वर्षा भएको छ । कैलालीस्थित कान्द्रा नदी पहलमानपुर जलमापन केन्द्रमा जलसतहले सतर्कता तह पार गरेको छ । 

यसैगरी बाराको कोल्हबी मापन केन्द्रमा भारी वर्षा मापन भएको मौसम विज्ञान विभागले जनाएको छ । 

यी क्षेत्रका नदी तथा खोलामा बाढीको जोखिम रहेको भन्दै तटीय क्षेत्रमा सतर्कता अपनाउन विभागले आग्रह गरेको छ ।

हाल काठमाडौं उपत्यकासहित देशका धेरै ठाउँमा वर्षा भइरहेको छ । 

आज दिउँसो कोशी, गण्डकी, लुम्बिनी, कर्णाली र सुदूरपश्चिम प्रदेशका केही स्थानमा हल्कादेखि मध्यम वर्षाको सम्भावना रहेको छ । गण्डकी, लुम्बिनी, कर्णाली र सुदूरपश्चिम प्रदेशका एक-दुई स्थानमा भने भारी वर्षाको सम्भावना रहेको मौसम पूर्वानुमान महाशाखाले जनाएको छ । 

राति कोशी, बागमती, लुम्बिनी, गण्डकी, सुदूरपश्चिम र कर्णाली प्रदेशका केही स्थानमा वर्षाको सम्भावना छ । 

कर्णाली, गण्डकी र लुम्बिनी प्रदेशका एक-दुई स्थानमा भारी वर्षाको सम्भावना रहेको महाशाखाले जनाएको छ ।

हाल देशभर मनसुनी वायुको प्रभाव रहेको छ। मनसुनको न्यून चापीय रेखा सरदर स्थानको केही उत्तर दिशा तर्फ अवस्थित रहेको छ ।