तनहुँको मर्स्याङ्दी नदीमा बस खस्दा ज्यान गुमाएका भारतीय पर्यटकको शव स्वदेश लगिएको छ । मृत्यु भएका २७ जनाको शव भारतीय एयरफोर्सको जहाज र एयर एम्बुलेन्समार्फत शनिवार अपरान्ह महाराष्ट्रस्थित नासिक लगिएको हो । 

२५ जनाको शव जहाज तथा २ जनाको एयर एम्बुलेन्सबाट लगिएको चितवनका प्रमुख जिल्ला अधिकारी इन्द्रदेव यादवले लोकान्तरलाई जानकारी दिए ।

पोखराबाट काठमाडौं जाने क्रममा शुक्रवार पृथ्वी राजमार्गबाट मर्स्याङ्दी नदीमा भारतीय नम्बर प्लेटको यूपी ५३ एफटी ७६२३ नम्बरको बस खस्दा २७ भारतीय पर्यटकले ज्यान गुमाएका थिए । मृतकहरूको चितवनस्थित भरतपुर अस्पतालमा पोस्टमार्टम गरिएको थियो । 

शव लिन भारतीय एयरफोर्सको जहाज भरतपुर विमानस्थल पुगेको थियो । प्रजिअ यादवका अनुसार नेपाल सरकारसँग भारतीय रक्षामन्त्रीको टोलीले टेलिफोनमार्फत छलफल गरेपछि चितवनबाट सिधै शव लैजाने निर्णय भएको हो । 

‘पोस्टमार्टम पूरा गरेपछि सबै शव भारतीय एयरफोर्स र एयर एम्बुलेन्समा राखियो । अहिले नासिकका लागि उडेको छ,’ उनले भने ।

दुर्घटनाका १६ जना घाइतेको काठमाडौंस्थित शिक्षण अस्पताल उपचार भइरहेको छ । भारत सरकारकी युवा तथा खेलकुद राज्यमन्त्री रक्षा खड्से घाइतेहरूको अवस्था बुझ्न शनिवार नेपाल आएकी छिन् ।