दुई छोरीलाई विष खुवाएर हत्या गरेकी महिला पुर्पक्षका लागि कारागार (जेल) चलान भएकी छिन् । विष खुवाएर नाबालिका दुई छोरीको हत्या आरोपमा पक्राउ परेकी अस्मिता पौडेल (कार्की) बिहीवार पुर्पक्षका लागि कारागार चलान भएकी हुन् । 

मोरङ जिल्ला अदालतका न्यायाधीश पारसमणि पोखरेलको इजलासले मंगलवार अस्मितालाई पुर्पक्षका लागि थुनामा राख्ने आदेश दिएको हो ।

अदालतको आदेशपछि उनी जिल्ला कारागार मोरङ चलान भएको अदालतका सूचना अधिकारी हेमबहादुर बुढाथोकीले जानकारी दिए ।

मोरङको सुन्दरहरैँचा नगरपालिका–७ मा विष खुवाएर दुई नाबालिका छोरीको हत्या गरेपछि अस्मिता फरार भएकी थिइन् । अस्मितालाई प्रहरीले भदौ १९ गते बिहान झापाको बिर्तामोडबाट नियन्त्रणमा लिएको थियो । 

पक्राउ परेकी अस्मितालाई इलाका प्रहरी कार्यालय बेलबारीले कर्तव्य ज्यान मुद्दामा म्याद थप गरेर अनुसन्धान शुरू गरेको थियो ।

निर्माणाधीन घरमा पानी नलगाएको विषयलाई लिएर पति अर्जुन कार्कीसँग विवाद भएपछि छोरीहरू तीन वर्षकी अर्पण र एक वर्षकी आइकालाई लिएर अस्मिता भदौ १४ गते साँझ हिँडेकी थिइन् । दुवै नाबालिका भोलिपल्ट अर्थात् भदौ १५ गते दिउँसो सुन्दरहरैँचा–७ का नारायण न्यौपानेको केरा बगानमा मृत फेला परेका थिए ।

दुई बालिकाको शव फेला परेको स्थानमा किटनाशक औषधिको बट्टा फेला परेको थियो । अस्मिताले विष खुवाएर नाबालिका छोरीहरूको हत्या गरेको प्रहरीको अनुसन्धानबाट खुलेको छ । 

पतिले दिएको ‘टर्चर’ सहन नसकेपछि छोरीहरूलाई पनि मार्ने र आफू पनि मर्ने योजना बनाएर घरबाट हिँडेको उनले प्रहरीलाई बयान दिएकी छिन् । छोरीहरूलाई विष खुवाएपछि आफूले पनि खाएको उनले बयानमा भनेको अनुसन्धानमा खटिएका प्रहरी अधिकृतहरूले बताएका छन् ।