३१ असार २०८३, बुधबार
वैदेशिक रोजगारीका नाममा ठगी गर्ने दुई व्यक्तिलाई काठमाडौं उपत्यका अपराध अनुसन्धान कार्यालय, टेकुको टोलीले पक्राउ गरेको छ।
पक्राउ परेका व्यक्तिहरूले आकर्षक तलब र सुविधाको प्रलोभनमा पारेर बेरोजगार युवायुवतीलाई विदेश पठाउने झुटो आश्वासन दिएका प्रहरीले जनाएको छ । प्रहरीका अनुसार उनीहरूले पीडितलाई विदेश नपठाई लामो समयसम्म झुक्यानमा राखेर सम्पर्कविहीन भएका थिए।
पक्राउ परेकामध्ये झापा गौरादह नगरपालिका-१ का ३६ वर्षीय सुदीप घिमिरेले जर्जिया पठाउने भन्दै दुई जनाबाट १२ लाख १० हजार रुपैयाँ ठगी गरेका थिए। उनलाई काठमाडौं महानगरपालिका-२६, गल्कोपाखाबाट बुधबार पक्राउ गरिएको हो ।
यस्तै, कञ्चनपुर भीमदत्त नगरपालिका-२ का ३४ वर्षीय भानु यजुवेन्द्र कण्ठले रोमानिया पठाउने प्रलोभनमा दुई जनाबाट दुई लाख रूपैयाँ ठगी गरेका थिए। उनलाई काठमाडौँ महानगरपालिका-६, बौद्ध क्षेत्रबाट मङ्सिर २७ गते पक्राउ गरिएको हो।
दुवै जनालाई थप अनुसन्धान र कानुनी कारबाहीका लागि वैदेशिक रोजगार विभाग, ताहाचल पठाइएको अपराध अनुसन्धान कार्यालयका प्रहरी उपरीक्षक काजी कुमार आचार्यले बताए ।
