१४ असार २०८३, आइतबार
युवा तथा खेलकुदमन्त्री तेजुलाल चौधरीले राष्ट्रिय एन्टी डोपिङ एजेन्सी (नाडा) नेपालको वेबसाइट शुभारम्भ गरेका छन् । सोमबार मन्त्री चौधरीले मन्त्रालयको सभाहलमा एक कार्यक्रमबीच उक्त वेबसाइटको उद्घाटन गरेका हुन् ।
उद्घाटनका क्रममा मन्त्री चौधरीले वेबसाइटमार्फत नेपाली खेलकुदको स्वच्छता र डोपिङविरोधी अभियानमा महत्त्वपूर्ण योगदान पुर्याउने बताए ।
कार्यक्रममा विभिन्न खेल महासंघका प्रतिनिधि, मन्त्रालयका अधिकारीहरू र अन्य सरोकारवाला व्यक्तिहरूको पनि उपस्थिति थियो ।
नयाँ वेबसाइटमा स्पीक अप प्लेटफर्म समावेश गरिएको छ ।
उक्त प्लेटफर्मको मद्दतले खेलाडी, कोच र आम नागरिकले कुनै पनि सन्दिग्ध डोपिङ घटनाहरूलाई गुमनाम रूपमा रिपोर्ट गर्न सक्छन् ।
साथै, वेबसाइटमा ईलर्निङ्ग प्लेटफर्म पनि प्रस्तुत गरिएको छ । उक्त प्लेटफर्मले डोपिङविरोधी शिक्षा प्रदान गर्नेछ।
यसले खेलकुद समुदायमा पारदर्शिता र जवाफदेहिताको सुनिश्चितता गर्दै स्वच्छ खेलको लागि योगदान गर्न मद्दत पुर्याउने मन्त्री चौधरीले बताए ।
'यस प्लेटफर्मको माध्यमबाट सिकाइ पूरा गरेपछि, सहभागीलाई तुरुन्त प्रमाणपत्र प्रदान गरिनेछ, जसले खेलकुदका अधिकारी र खेलाडीहरूलाई डोपिङ नियम र नैतिक मापदण्डबारे सुसज्जित बनाउँछ,' मन्त्री चौधरीले भने ।
नाडा नेपालका संस्थापक डा. असिम भण्डारीले वेबसाइटलाई विश्व एन्टी डोपिङ एजेन्सी (वाडा)को मापदण्ड र स्ट्यान्डर्ड कोडअनुसार डिजाइन गरिएको बताएका थिए ।
यो पहलले नेपालको खेलकुद क्षेत्रमा डोपिङविरोधी प्रयासलाई मजबुत बनाउन र पारदर्शिता र नैतिक वातावरण सिर्जना गर्न ठूलो योगदान पुर्याउने अपेक्षा गरिएको छ।
