१४ असार २०८३, आइतबार
ड्युटीमा रहेका प्रहरीलाई कुटपिट गरेको आरोपमा नेकपा एमालेको विद्यार्थी संगठन अनेरास्ववियुका नेता कमल जोशी पक्राउ परेका छन् ।
उनलाई बिहीबार साँझ बानेश्वरबाट नियन्त्रणमा लिइएको जिल्ला प्रहरी परिसर काठमाडौंका प्रवक्ता, एसपी अपील राज बोहोराले जानकारी दिए । यही घटनामा यसअघि दुई जना पक्राउ परिसकेका छन् ।
जोशीसहितको समूहले माघ २४ गते राति ठमेलमा ड्युटीमा रहेका प्रहरीमाथि कुटपिट गर्दै सवारी साधनमा तोडफोड समेत गरेका थिए । उनीहरूको आक्रमणबाट प्रहरी दरबारमार्ग वृत्तका क्वीक रेस्पोन्स टिम (क्युआरटी)का प्रहरी हवल्दार जगुलाल चौधरी र जवान नर्गेन्द्रराज विष्ट घाइते भएका थिए ।
प्रहरीले यही प्रकणमा जोडिएका ताप्लेजुङका दिनश सिग्देल र डडेल्धुराका रमेश फुलारालाई माघ २७ गते पक्राउ गरेको थियो । तर, जोशीले उन्मुक्ति पाएका थिए । जोशी अनेरास्ववियुका स्थायी कमिटी सदस्य एवं अमृत साइन्स क्याम्पस (अस्कल) इकाइका पूर्वअध्यक्ष हुन् ।
सत्ताको दबाबमा उनका विरुद्ध पक्राउ पुर्जी नमागेको भन्दै प्रहरीको आलोचना भएको थियो ।
हालै प्रहरीले जिल्ला प्रशासन कार्यालयबाट अभद्र व्यवहार मुद्दामा पक्राउ पुर्जी लिई जोशीलाई समातेको हो ।
प्रहरी हवल्दार घर्तीको राष्ट्रिय ट्रमा सेन्टरमा उपचार भएको थियो । प्रहरी हवल्दार घर्तीको टाउकोसहित शरीरको विभिन्न भागमा चोट लागेको थियो । त्यस्तै, जवान विष्टको आँखामा र शरीरका अन्य भागमा सामान्य चोट लागेको बताइएको छ ।
