‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ–

‘भ्रष्टाचार निवारण (पहिलो संशोधन) विधेयक, २०८१’ प्रतिनिधिसभाबाट सर्वसम्मतिले पारित भएको छ । 

प्रधानमन्त्री केपी शर्मा ओलीको तर्फबाट गृहमन्त्री रमेश लेखकले सभासमक्ष पेस गरेको विधेयक सभाले सर्वसम्मतिले पारित गरेको हो । सोही अवसरमा विधेयकमाथिको छलफलमा उठेका प्रश्नको जवाफ दिँदै मन्त्री लेखकले नागरिकको सुख, शान्ति तथा आर्थिक हित, समाजमा आर्थिक अनुशासन, नैतिकता र सदाचार कायम राख्न र भ्रष्टाचार अन्त्य गर्न विधेयक ल्याउनुपरेको प्रष्ट पारे ।

श्रम, रोजगार तथा सामाजिक सुरक्षामन्त्री शरत्सिंह भण्डारीले सभासमक्ष ‘अन्तर्राष्ट्रिय श्रम सम्मेलनले स्वीकृत गरेका नयाँ अन्तर्राष्ट्रिय श्रम मापदण्डको संयन्त्रहरू (महासन्धि, प्रोटोकल र सिफारिस) सम्बन्धी प्रतिवेदन’ पेस गरेका थिए ।
००००
‘नेपाल प्रहरी विधेयक, २०८१  माथि विचार गरियोस्’ भन्ने प्रस्ताव प्रतिनिधिसभाबाट सर्वसम्मतिले स्वीकृत भएको छ ।     

विधेयक सर्वसम्मतिले स्वीकृत भएको घोषणा गर्दै सभामुख देवराज घिमिरेले विधेयकमाथि प्रतिनिधिसभा नियमावली २०७९ को नियम ११२ बमोजिम संशोधन पेस गर्न चाहने सांसदलाई सङ्घीय संसद् सचिवालय सिंहदरबारमा पेस गर्नसक्ने जानकारी दिए ।
००००
सर्वोच्च अदालतले गिरिबन्धु टी इस्टेटको जग्गासम्बन्धी मुद्दाको फैसला कार्यान्वयन नगरेको उल्लेख गर्दै दर्ता भएको अवहेलना निवेदनमा सरकारका नाममा कारण देखाउ आदेश गरेको छ । 

न्यायाधीशहरू सारङ्गा सुवेदी र नित्यानन्द पाण्डेयको इजलासले सात दिनभित्र लिखित जवाफ माग्नुका साथै सम्बन्धित मुद्दाको फाइल राख्न आदेश गरेको हो ।
००००
नेपालस्थित भारतीय दूतावासले भारतमा अध्ययनरत नेपाली विद्यार्थीहरू दुई देशबीचको स्थायी जनस्तरको सम्बन्धका महत्त्वपूर्ण पक्ष भएको बताएको छ । 

भारत सरकारले आफ्नो देशमा रहेका नेपाली विद्यार्थीहरूको हकहित सुनिश्चितका लागि आवश्यक सबै कदम चाल्ने पनि दूतावासको भनाइ छ । 
ओडिशाको भुवनेश्वरमास्थित कलिंगा इन्स्टिच्युट अफ इन्डस्ट्रियल टेक्नोलोजीमा एक नेपाली विद्यार्थीको दुःखद मृत्यु भएको खबरप्रति दूतावासले दुःख व्यक्त गरेको छ ।  यस कठिन घडीमा यस दूतावासले मृतकको परिवारप्रति हार्दिक समवेदना प्रकट गरेको छ । यस्तै नेपाल सरकारले घटनाका सम्बन्धमा कूटनीतिक पहल भइरहेको जनाएको छ । 
००००
संयुक्त राष्ट्र संघीय शान्ति मिसन (यूएन मिसन)मा जानका लागि प्रहरीका नक्कली सहायक निरीक्षक (असई)लाई रकम बुझाएको घटनामा सशस्त्र प्रहरीका ८ जनामाथि छानबिन शुरू भएको छ ।

सशस्त्र प्रहरी मुख्यालयकै आग्रहमा काठमाडौं उपत्यका अपराध अनुसन्धान कार्यालयले अहिले ति नक्कली प्रहरीलाई पक्राउ गरेर अनुसन्धान अघि बढाएको हो । सशस्त्र प्रहरी बल प्रधान कार्यालयले भने आठै जनामाथि छानबिन गरिरहेको छ ।
००००
नेपाल प्रहरीमा अनुसन्धान अधिकृतहरूको (मुद्दा शाखामा कार्यरत) संख्या कम हुँदा कार्यसम्पादनमा असर परिरहेको छ ।

 प्रहरीमा आउने मुद्दाको संख्या बढ्दै गएको तर, जनशक्ति त्यसअनुरूप नहुँदा प्रहरीको कार्यसम्पादनमा मात्र होइन सेवाग्राहीलाई पनि असर परिरहेको छ । प्रहरीका अनुसार हाल कूल जनशक्तिको ४.६ प्रतिशत मात्रै अनुसन्धान अधिकृतहरू छन् ।
००००
शेयर बजारमा लगातार दोस्रो दिन दोहोरो अंकको वृद्धि भएको छ । सोमबार नेप्से परिसूचक २९.८७ अंकले बढेर २७२७.९१ बिन्दुमा कायम भएको छ ।
००००
कीर्तिपुर बर्न अस्पतालमा उपचाररत उपप्रधान एवं अर्थमन्त्री विष्णु पौडेल सोमबार डिस्चार्ज भएका छन् ।

पोखरा महानगरपालिकाका प्रमुख धनराज आचार्य भने अझै केही दिन चिकित्सकको निगरानीमा अस्पतालमै रहने भएका छन् ।