काठमाडौं । नेकपा एमालेका केन्द्रीय सदस्य एवम् प्रतिनिधिसभाका लागि वामगठबन्धनका काठमाडौं क्षेत्र नम्बर ४ का उम्मेदवार डा राजन भट्टराईले काँग्रेसका गगन थापालाई आफूले सहजै जित्ने दाबी गर्नुभएको छ ।

 प्रेस चौतारी नेपाल र प्रेस सेन्टरको काठमाडौं डेक्सले आयोजना गरेको अन्तरक्रिया कार्यक्रममा बोल्दै भट्टराईले भन्नुभयो, हामीसँग समृद्धि र विकासको खाका छ, म अहिले यति उति भन्दिनँ तर प्रतिस्पर्धीलाई सहजै जित्छु । लोकतन्त्र र विकास सँगसँगै अघि बढ्ने भन्दै भट्टराईले अबको मुद्वा आर्थिक विकास भएको बताउँदै निर्वाचनपछि बन्ने सरकारले स्थायित्व, सुशासन र विकास निर्माणमा केन्द्रीत हुने बताउनुभयो ।

विगतमा लोकतन्त्रको कुरा अघि बढेपनि विकासका मुद्वा ओझेलमा परेको उहाँले बताउनुभयो। निर्वाचनपछि वामपन्थीको स्थायी सरकार निर्माण हुने र आर्थिक विकासको मुद्वा दुर्तगतिमा अघि बढाउने उहाँको भनाई थियो ।

कांग्रेसले २०१५, २०४८ र २०५६ मा बहुमत ल्याएपनि आफ्नै कलहले सरकार ढलेको र विकास निर्माण गर्न नसकेको डा भट्टराईको भनाई थियो । ‘अब राजनीतिले राष्ट्रिय योजना र विकाससँग जोड्नुपर्छ’ उहाँले भन्नुभयो । जनताको दैनिकी बदल्न अब बन्ने नेतृत्वले ध्यान दिने उहाँको भनाई थियो ।

क्षेत्र नम्बर ४ मा आफ्नो जित सुनिश्चित भएको र सुविधाजनक ढंगले जित्ने दावी गर्नुभयो । देशमा विदेशी हस्तक्षेप बढेको भन्दै डा भट्टराईले भन्नुभयो,‘ संविधान कहिले जारी गर्ने, कति प्रदेश बनाउने लगायका मुद्वामा हामी निर्णय गर्न सक्छौं’ भट्राईले स्थानीय तहदेखि राष्ट्यि तहसम्मका समस्याको समाधानका लागि आफूहरुले जनतासमक्ष मत मागिरहेको बताउँदै निर्वाचनले स्थिर सरकार, सुशासन र समृद्धि दिने जनाउनुभयो ।

क्षेत्र नं. १ का उम्मेदवार माओवादी केन्द्रका युवा नेता अनिल शर्माले विद्यमान राजनीति र नेतालाई गाली गरेर होइन विगतका आन्दोलन र उपलब्धीको स्मरण गरेर अघि बढ्नुपर्नेमा जोड दिनुभयो ।

‘काठमाडौं १ को विकासले नयाँ नेपालको खाका कोर्न सक्छ’ उहाँले भन्नुभयो । काठमाडौँको प्रदूषण र खाद्यान्नको विषादी हटाउने, सार्वजनिक खुल्ला स्थल खडा गर्ने, वागमती स्वच्छ तथा राजधानीलाई शैक्षिक केन्द्र बनाउनेमा योजना रहेको भट्टराईले बताउनुभयो ।

आफ्नो क्षेत्र देशकै झल्को दिने ठाउँ रहेको भन्दै आफ्नो क्षेत्रलाई नमूना बनाउन लाग्ने उहाँको भनाई थियो । अब देशमै रोजगारी सिर्जना गर्न, गरिबी हटाउन नयाँ सरकारले जोड दिने बताउनुभयो ।