२२ असार २०८३, सोमबार
गृहमन्त्री रमेश लेखकले सरकारले मानिसको मुख हेरेर नगर्ने बताएका छन् ।
नेपाल प्रेस युनियन मोरङले बुधबार विराटनगरमा आयोजना गरेको पत्रकार सम्मेलनमा उनले सरकारले मुद्दाका आधारमा मानिस पक्राउ गर्ने बताए ।
सहकारी प्रकरणमा जोडिएका जीबी राई, प्रतिनिधिसभा सदस्य गीता बस्नेत लगायत कहिले पक्राउ पर्छन् भन्ने प्रश्नमा उनले यस्तो बताएका हुन् ।
‘छिटो समात्यो भनेपनि प्रश्न उठ्छ’, उनले भने, ‘ढिलो समात्यो भने पनि अझै किन नसमाएको भनेर प्रश्न उठ्छ । गर्ने चाहिँ के हो त ? समात्ने कि नसमात्ने त ?’
कुनै एउटा केशमा केही भएको भन्ने मात्रै उनले जवाफ दिएका छन् । उनले थपे ‘सामान्यतयाः अदालतले पूर्जी जारी गर्ने बित्तिकै त्यो मानिसलाई समात्नुपर्छ । कोही मानिस समातिएको छैन भने हामी समात्नतिर जान्छौं । कसैलाई समात्ने र कसैलाई नसमात्ने कुरा हुँदैन । जीबी राईको बारेमा पनि कुरा उठेको छ । यसको विषयमा सरकारले, गृह मन्त्रालयले गर्ने काम गरिरहेको छ । यिनी कहाँ छन् ? अहिलेसम्म के भएको छ, कसो भएको छ भनेर मैले अहिले नै भनिहाल्ने कुरा हुँदैन ।’
उनले आफू मन्त्री भएर आइसकेपछि राजस्वमा वृद्धि भएको पनि दाबी गरेका छन् । प्रदेशस्तरीय सुरक्षा समितिको बैठकमा पुगेका मन्त्री लेखकले कोशीमा पहिचान स्थापित गर्नुपर्छ भन्ने खालको विचार उठेको बताएका छन् ।
ताप्लेजुङमा केबलकार बनाउनु हुन्न भन्ने वा त्यसलाई एक ढंगले लिनुपर्छ भन्ने कुरा पनि उठेका गृहमन्त्री लेखकले बताए । शान्ति सुरक्षाका स्थितिमा गम्भीर चुनौती नरहेको उनले स्पष्टीकरण दिए ।
पूर्वराजावादीहरूले फेरि राजतन्त्र ल्याउने भनेर गरिरहेका गतिविधिको पनि समीक्षा भएको उनले बताए । ‘यसलाई राजनीतिक रूपले पनि सामना गर्नुपर्छ । प्रशासनिक हिसाबले पनि संविधानको रक्षा गर्ने, व्यवस्थाको रक्षा गर्ने काममा सरकार लाग्छ भन्ने हामीले निकर्ष निकालेका छौं’, उनले भने ।
