२२ असार २०८३, सोमबार
नेकपा एकीकृत समाजवादीले अध्यक्ष माधवकुमार नेपालमाथि षड्यन्त्र भएको निष्कर्ष निकालेको छ । बिहीबार अख्तियार दुरुपयोग अनुसन्धान आयोगले नेपालसहित ९३ जनाविरुद्ध विशेष अदालतमा भ्रष्टाचार मुद्दा दायर गरेपछि बसेको बैठकले यस्तो निष्कर्ष निकालेको हो ।
गलत, भ्रमपूर्ण र योजनाबद्ध तरिकाबाट अध्यक्ष नेपालमाथि षड्यन्त्र भएको निष्कर्ष निकालिएको उपाध्यक्ष प्रकाश ज्वालाले जानकारी दिए ।
बैठकपछि सञ्चारकर्मीलाई प्रतिक्रिया दिँदै उपाध्यक्ष ज्वालाले अध्यक्ष नेपालले यो मुद्दामा अदालतबाट क्लिनचिट लिएर गलत, योजनाबद्ध षड्यन्त्र खारेज गर्ने सन्देश दिनेगरी फर्किने पनि दाबी गरे ।
‘वर्तमान सरकारले राजनीतिक बदलाको भावनाबाट प्रेरित रही हाम्रो पार्टीका विरुद्ध विगतदेखि नै षडयन्त्रहरू गर्दै आएको कुरा विभिन्न बेलामा देखिएको र तिनलाई हामीले सार्वजनिक गर्दै आएका थियौ’, बैठकपछि महासचिव घनश्याम भुसालले जारी गरेको विज्ञप्तिमा भनिएको छ, ‘यो हाम्राविरुद्ध षडयन्त्र अर्को घटना हो भन्ने हाम्रो ठहर छ । त्यस्तो कुनै पनि पड्यन्त्रको प्रतिवाद गरिने छ ।’
यस घटनामा अध्यक्ष नेपालले ‘नबिराउनु, नडराउनु’ भनेर आफ्नो प्रारम्भिक धारणा सार्वजनिक गरिसकेको नेकपा एसले जनाएको छ । त्यसरी नै कानूनी प्रक्रियाको सामना गर्ने दृढता व्यक्त गरिसकेको पनि भुसालले बताएका छन् ।
‘अख्तियार दुरुपयोग अनुसन्धान आयोगले दर्ता गरेको मुद्दाका बारेमा गरिने कुनै पनि कुप्रचार र भ्रममा नपर्न पार्टी पङ्क्ति र जनसमुदायलाई अनुरोध गरिन्छ’, भुसालले भनेका छन् ।
