२७ असार २०८३, शनिबार
स्पेनको सामाजिक अधिकार मन्त्रालयले क्षमतावान युवा फुटबल खेलाडी लामिन यामलले आफ्नो जन्मदिन मनाउने क्रममा देखाएको गतिविधिलाई लिएर छानबिन अगाडि बढाउन निर्देशन दिएको छ ।
सामाजिक अधिकार मन्त्रालयले सरकारी वकिलको कार्यालयलाई यामलको विषयमा छानबिन अघि बढाउन निर्देशन दिएको हो । यामल स्पेनिस ‘पावर हाउस’ बार्सिलोनाका प्रभावशाली युवा खेलाडी हुन् ।
विंगर यामलले बार्सिलोनाबाट एकपछि अर्को उत्कृष्ट प्रदर्शन गर्दै आएका छन् । यामलले आफ्नो १८औं जन्मदिन मनाउने क्रममा शारीरिक रूपमा कम उचाइ भएका व्यक्तिलाई मनोरञ्जनको माध्यमका रूपमा प्रयोग गरेको आरोप लागेको छ ।
यामल स्पेनको राष्ट्रिय टोलीका सदस्य पनि हुन् । उनले सन् २०२३ मा स्पेनको सिनियर राष्ट्रिय टोलीमा स्थान पाएका थिए । यामलले केही दिनअघि बार्सिलोनाभन्दा करिब ५० किलोमिटर उत्तर–पश्चिमा रहेको ओलिभेला शहरमा आफ्नो जन्मदिन मनाएका थिए ।
१८औं जन्मदिन मनाउने क्रममा उनले पैसा दिएर शारीरिक रूपमा कम उचाइ भएका व्यक्तिलाई मनोरञ्जनका लागि प्रयोग गरेको आरोप लगाइएको छ । समाचारमा जनाइए अनुसार, स्पेनको कानूनले यस्ता गतिविधिमा रोक लगाएको छ ।
यामलको जन्मदिनको पार्टीमा केही युट्युबर र बार्सिलोनाका थुप्रै खेलाडी पनि सहभागी रहेको दाबी समाचारमा गरिएको छ । शारीरिक रूपमा फरक क्षमता भएका व्यक्तिहरूको संस्था (एडीईई)ले यस विषयमा सामाजिक अधिकार मन्त्रालयमा उजुरी गरेको थियो ।
सोही उजुरीका आधारमा मन्त्रालयले यामलविरुद्ध आवश्यक छानबिन अगाडि बढाउन निर्देशन दिएको हो । ‘२१औं शताब्दीमा यो अस्वीकार्य काम हो,’ उजुरीमा एडीईईले भनेको छ ।
