३० असार २०८३, मंगलबार
भीयतनामको उत्तरी क्षेत्रस्थित लोकप्रिय पर्यटकीय गन्तव्य हालोङ बेमा पर्यटक बोकेको डुंगा पल्टिँदा कम्तीमा ३४ जनाको मृत्यु भएको छ भने केही अझै बेपत्ता छन् ।
दुर्घटना खराब मौसमका कारण भएको बताइएको छ । डुंगा ‘वण्डर सिज’ नामक जलयात्रा जहाज थियो, जसमा ५३ जना सवार थिए । भीयतनामी सीमा सुरक्षा बल र नौसेनाले जारी गरेको विज्ञप्तिअनुसार डुंगा अचानक आएको आँधीमा परेपछि पल्टिएको बीबीसीले जनाएको छ ।
डुंगामा रहेका अधिकांश यात्रुहरू राजधानी हानोईबाट आएका भीयतनामी परिवारहरू थिए ।
उद्धारकर्ताहरूका अनुसार भारी वर्षाका कारण जीवित व्यक्तिको खोजीमा कठिनाइ भइरहेको छ, तर अहिलेसम्म ११ जनालाई जीवितै उद्धार गरिएको छ ।
शनिबार दिउँसो करिब २ बजे स्थानीय समयअनुसार आकाश अन्धकारमय हुँदै हावाहुरी, चट्याङ र असिना पर्न थालेको एक प्रत्यक्षदर्शीले समाचार संस्था एएफपीलाई बताएका छन्। उनका अनुसार औँलाजत्रा ठूला असिना परेका थिए ।
स्थानीय सञ्चारमाध्यमका अनुसार एउटा १० वर्षे बालक डुंगाको उल्टिएको ढाँचा भित्रको हावाको खाली स्थानमा थुनिएको अवस्थामा जीवित भेटिएका छन् ।
हालसम्म उद्धार गरिएका शवहरूमध्ये कम्तीमा आठ जना बालबालिका रहेको त्यहाँको राष्ट्रिय सञ्चारमाध्यमले जनाएको छ।
अझै बेपत्ताहरूको खोजीका लागि उद्धारकार्य रातभर जारी रहनेछ ।
प्रधानमन्त्री फाम मिन्ह चिन्हले मृतकका परिवारप्रति समवेदना व्यक्त गरेका छन् । दुर्घटनाको कारण छानबिन गरिने सरकारी विज्ञप्तिमा उल्लेख छ।
क्वाङ निन्ह प्रान्तमा अवस्थित हालोङ बे सयौं स-साना टापुहरूले भरिएको युनेस्को विश्व सम्पदा सूचीमा पर्ने स्थल हो । सन् २०१९ मा यहाँ ४० लाखभन्दा बढी पर्यटक आएका थिए ।
