०३ असार २०८३, बुधबार
गौतमबुद्ध अन्तर्राष्ट्रिय विमानस्थल नियमित सञ्चालनका पटक-पटक संघर्ष गर्दै आइरहेका व्यवसायी र स्थानीय तहले सरकारलाई दबाब सिर्जना गर्न पुन: संघर्ष समिति गठन गरेका छन् ।
आइतबार सिद्धार्थनगर नगरपालिकामा भैरहवामा सम्पन्न उद्योगी, व्यवसायी र जनप्रतिनिधिको बैठकले गौतमबुद्ध अन्तर्राष्ट्रिय विमानस्थलबाट नियमित उडानका लागि दबाब दिन संघर्ष समिति गठनको निर्णय गरेको हो ।
सिद्धार्थनगर नगरपालिकाका प्रमुख इश्तियाक अहमद खाँको संयोजकत्वमा संघर्ष समिति गठन गरिएको छ । संघर्ष समितिको सहसंयोजकमा सिद्धार्थनगरका उपप्रमुख उमा अधिकारी र सदस्यहरूमा सिद्धार्थ होटल संघ नेपालका अध्यक्ष चन्द्रप्रकाश श्रेष्ठ, सिद्धार्थ उद्योग वाणिज्य संघका अध्यक्ष नेत्रप्रसाद आचार्य, उद्योग व्यापार संगठन रुपन्देहीका अध्यक्ष दर्पण श्रेष्ठ छन् ।
यस्तैगरी, अन्य सदस्यहरूमा सिद्धार्थ उद्योग वाणिज्य संघका पूर्वअध्यक्ष महेन्द्रकुमार श्रेष्ठ, संघकै पूर्वअध्यक्ष तथा पर्यटन व्यवसायी विष्णुप्रसाद शर्मा र सिद्धार्थ सञ्जाल, रुपन्देहीका अध्यक्ष अनिलकुमार ज्ञवाली छन् ।
समितिले एक हप्तामा विमानस्थल सञ्चालनमा देखिएका समस्या, समाधानका उपाय र संघर्षका कार्यक्रमबारे खाका तयार पार्ने छ । त्यसपछि पत्रकार सम्मेलनमार्फत आन्दोलनका कार्यक्रम घोषणा गर्ने तयारी समितिको छ ।
साथै सबै पार्टीका जिल्लास्थित र केन्द्रका नेताहरूलाई भेट गरी ध्यानाकर्षण गराइने छ । त्यसपछि विमानस्थल नियमित सञ्चालनमा नआउँदासम्म निरन्तर दबाबका कार्यक्रम गरिने नगर प्रमुख खाँले बताए ।
नगरपालिकाको पहलमा आइतबार भैरहवामा आयोजित निजी क्षेत्र र संघसंस्थाहरूबीचको छलफलमा सहभागी निजी क्षेत्र र सरोकारवालाले अब संघर्ष गरेर जानुपर्ने निचोड निकालेपछि संघर्ष समिति गठन गरिएको छलफलमा सहभागी सिद्धार्थ उद्योग वाणिज्य संघ, रुपन्देहीका अध्यक्ष नेत्रप्रसाद आचार्यले बताए ।
चुनाव बहिष्कारको चेतावनी
बैठकमा सहभागी उद्योगी–व्यवसायी र स्थानीय तहका जनप्रतिनिधिले गौतमबुद्ध अन्तर्राष्ट्रिय विमानस्थल नियमित सञ्चालनमा नआए आगामी कात्तिक १७ मा हुने रुपन्देही–३ को उपनिर्वाचन बहिष्कार गर्ने चेतावनी दिएका छन् ।
मुलुकका दुई ठूला दल कांग्रेस र एमालेको संयुक्त सरकार हुँदा समेत विमानस्थल नियमित सञ्चालनमा ध्यान नदिएको गुनासो उनीहरूको छ । नगरले आफैंले नेतृत्व गरेर जस्तोसुकै आन्दोलन गर्न तयार रहेको नगर प्रमुख खाँले बताए ।
उपप्रमुख अधिकारीले उपनिर्वाचन नजिकिदै जाँदा सबै दलका ठूला नेता रुपन्देही आउने भएकाले पहिलो चरणमा ती नेताहरूलाई भेटेर छलफल गरी दबाब सिर्जना गर्नुपर्ने बताइन् ।
सिद्धार्थ उद्योग वाणिज्य संघका पूर्वअध्यक्ष तथा पर्यटन व्यवसायी विष्णुप्रसाद शर्माले सबैभन्दा पहिला विमानस्थल चलाउन आवश्यक कार्यालय खोलिनुपर्ने बताए ।
सिद्धार्थ होटल संघ नेपालका अध्यक्ष चन्द्रप्रकाश श्रेष्ठले अब आन्दोलनको विकल्प नभएको बताए ।
तीन वर्षअघि उद्घाटन भएको विमानस्थलमा अहिले अन्तर्राष्ट्रिय उडान छैनन् । केही समय दुई/चार वटा अन्तर्राष्ट्रिय एयरलाइन्स आए पनि विभिन्न कारण देखाउँदै उडान कटौती गर्दै आएका छन् ।
