२२ असार २०८३, सोमबार
नेकपा माओवादी केन्द्रको विद्यार्थी संगठन, अनेरास्ववियु क्रान्तिकारी आबद्ध विद्यार्थीहरूले त्रिभुवन विश्वविद्यालयका रजिस्ट्रार केदार रिजालमाथि हातपात गरेका छन् ।
त्रिवि उपकुलपति प्राडा. दीपक अर्यालको कार्यकक्ष अगाडि ढोकामा रिले अनशन बसेका क्रान्तिकारी नेताहरूले रजिस्ट्रार रिजालमाथि हातपात गरेको त्रिवि प्रशासनले जनाएको छ ।
उनीमाथि हातपात गरेको भन्दै अखिल (क्रान्तिकारी) का केन्द्रीय उपाध्यक्ष अटल आचार्य, उपत्यका विशेष प्रदेश इन्चार्ज निरोज श्रेष्ठलगायतका नेताहरू पक्राउ परेका छन् । अर्यालको कार्यकक्ष अगाडि ढोकामा अखिल क्रान्तिकारीले १९ दिनदेखि धर्ना दिइरहेको थियो ।
उनीहरूले रजिस्ट्रार रिजाललाई टेबल क्यालेण्डर प्रहार गर्नुका साथै पानीको गिलासले प्रहार गरेको बताइएको छ । तोडफोडबाट रजिस्ट्रार कार्यालय क्षतिग्रस्त भएको छ भने रजिस्ट्रार रिजाललाई सामान्य चोट लागेको छ । त्यसक्रममा विद्यार्थी र प्रहरीबीच केहीबेर झडप समेत भएको थियो ।
अखिल क्रान्तिकारी पूर्वअध्यक्ष पञ्चा सिंहले भने प्रहरीले दमन र धरपकड गरिएको बताएकी छन् । उनले त्रिभुवन विश्वविद्यालयमा शुल्क वृद्धि विरुद्धको विद्यार्थी आन्दोलनको १९ औं दिनसम्म पनि वार्ता र संवादको कुनै पहल नगरी उल्टै प्रहरी परिचालन गरेर दमन गरिएको बताएकी छन् ।
‘यस प्रकारको पञ्चायती शैलीले लोकतान्त्रिक मूल्य र मान्यताको उपहास गरेको छ । शान्तिपूर्ण आन्दोलनमाथि गरिएको यो दमनले विद्यार्थीको अभिव्यक्ति स्वतन्त्रता र अधिकारको हनन् भएको छ । आन्दोलनरत विद्यार्थीमाथि गरिएको धरपकड निन्दनीय छ’, सिंहले भनेकी छन् ।
उनले पक्राउ परेका विद्यार्थी नेताहरूको अविलम्ब रिहाइको माग गरेकी छन् । उनले प्रहरी आक्रमणका कारण त्रिवि इन्चार्ज ममता जोशी बेहोस भएको उल्लेख गरेकी छन् ।
