२१ असार २०८३, आइतबार
भारतीय विदेश सचिव विक्रम मिस्री दुई दिने नेपाल भ्रमण सकेर स्वदेश फिर्ता भएका छन् ।
परराष्ट्र सचिव अमृतबहादुर राईको निमन्त्रणामा आइतबार नेपाल आएका उनी सोमबार साँझ स्वदेश फर्किएका हुन् ।
विदेश सचिव मिस्रीले नेपाल भ्रमणका क्रममा राष्ट्रपति रामचन्द्र पौडेल, प्रधानमन्त्री केपी शर्मा ओली र परराष्ट्रमन्त्री डा. आरजु राणा देउवासँग भेटवार्ता गरेका थिए ।
भेटमा उनले भारतको नेतृत्वको शुभकामना व्यक्त गर्नुका साथै दुई देशबीचका पारस्परिक लाभका द्विपक्षीय सहकार्यका विभिन्न पक्षहरूमा भएको प्रगतिबारे जानकारी गराएका थिए ।
विदेश सचिवले प्रधानमन्त्री ओलीलाई दुवै पक्षलाई अनुकूल हुने मितिमा भारतको भ्रमण गर्न भारतका प्रधानमन्त्री नरेन्द्र मोदीले दिएको औपचारिक निमन्त्रणा हस्तान्तरण गरेका थिए ।
यस्तै उनले प्रधानसेनापति अशोकराज सिग्देललाई पनि भेटी नेपाली सेनालाई छ थान सवारीसाधन, पाँच वटा घोडा र विस्फोटन तथा विपद्का घटनापछि खोजी र अनुसन्धानमा प्रयोग हुने दुई वटा कुकर हस्तान्तरण गरेका थिए ।
विदेश सचिवले राजनीतिक दलका नेताहरूसँग पनि भेट गरेका थिए ।
