भारत मध्यप्रदेशको सिरोन्ज गाउँको नयाँपूरा क्षेत्रमा बस्ने रेनुका नामदेवको उचाइ मात्र ३ फिट ८ इन्च छ । आफ्नो यही शारीरिक बनावटका कारण रेनुका विवाह गर्न चाहँदिनथिइन् ।

तर जब उनको भेट महाराष्ट्रको अकोला निवासी प्रतीक धानुकासँग भयो, तब उनी नयाँ जीवन शुरू गर्न तयार भइन् ।

रेनुका नामदेवका अनुसार, उनी कसैमाथि बोझ बन्न वा कसैका लागि लज्जाको कारण बन्न चाहँदिन थिइन् । त्यसैले उनले विवाह नगर्ने निर्णय गरेकी थिइन् । 

शारीरिक बनावटकै कारण कसैलाई समस्या नहोस् भन्ने उनको चाहना थियो । यद्यपि, प्रतीक धानुकासँग भेट भएपछि उनी खुसी–खुसी विवाहका लागि तयार भइन् ।

रेनुकाका परिवारले छोरीका लागि समझदार र राम्रो स्वभावका जीवनसाथी खोजिरहेका थिए । उता, महाराष्ट्रको अकोला निवासी प्रतीक धानुकाका परिवारले पनि संस्कारी र समझदार केटीको अपेक्षा गरेका थिए ।

रेनुकाको उचाइ ३ फिट ८ इन्च र प्रतीकको उचाइ ४ फिट २ इन्च भएकाले दुवैलाई आफ्नो लागि उपयुक्त जीवनसाथी छनोट गर्न धेरै कठिनाइ सामना गर्नुपरेको थियो । 

त्यसपछि दुवै परिवारले सामाजिक सञ्जालको सहारा लिएर संवाद शुरू गरे । विचार र स्वभाव मिल्दै जाँदा यो सम्बन्ध क्रमशः बलियो बन्दै गयो ।

प्रतीक हाल पुणेस्थित एक कम्पनीमा कार्यरत छन् भने रेनुकाले एमएसम्मको अध्ययन पूरा गरेकी छन् । दुवै परिवारको सहमतिमा यो विवाह सम्पन्न भएको हो । 

अकोलामा आयोजित उनीहरूको स्वागत समारोहमा ठूलो संख्यामा आफन्त र साथीभाइ सहभागी भए र नवदम्पतीलाई शुभकामना दिए ।

आज यो अनौठो विवाह शहरभर चर्चाको विषय बनेको छ । यो जोडी धेरैका लागि प्रेरणाको स्रोत बन्दै गएको छ । प्रेम, विश्वास र समझदारी भए कुनै पनि कुरा अवरोध बन्न सक्दैन भन्ने सन्देश यस विवाहले दिएको छ ।