१२ असार २०८३, शुक्रबार
नेपालगन्ज, १२ चैत— नेपालगन्ज हुँदै कोहलपुरसम्म रेल सेवा सञ्चालन गर्ने योजनाअन्तर्गत धमाधम काम अघि बढिरहेको छ । भारतीय प्राविधिकको टोलीले हालै सीमा बजार रुपैडिहाको नेपालगन्ज रोडबाट कोहलपुरसम्म ‘लिक’ रेखांकन सकेको छ ।
अब लागत रकम, आवश्यक भौतिक संरचना र रेल सेवाले छुने बस्तीको पहिचानलगायत काम थालिँदै छ । नेपाल रेल विभागका सब–इन्जिनियर रमेश यादवले दुई–तीन दिनमै अन्तिम अध्ययनको काम पूरा हुने बताए ।
उनी भारतीय टोलीलाई सघाउन नेपालगन्ज आएका हुन् । ‘एक सातामै अध्ययन सकिने भनिए पनि एक–दुई दिन बढी लागेको छ । केही दिनमै सबै काम पूरा हुन्छ,’ उनले भने, ‘प्राविधिक टोलीले भारतको केन्द्रीय सरकारलाई प्रतिवेदन बुझाएपछि थप काम अघि बढ्नेछ ।’
टोलीले रुपैडिहास्थित रेलवे स्टेसन र कोहलपुरसम्मको साढे १८ किमि दूरीमा रेखांकन सकेको हो । जसअनुसार पिप्रहवा, पुरैना, पुरैनी, राँझा, हबल्दारपुर र रझेनालगायत गाउँ छिचोलेर ‘लिक’ राखिनेछ । रेल बस्तीभित्र भने नलगिने सब–इन्जिनियर यादवले बताए । ‘यात्रुको सुविधाका लागि रेल सञ्चालन गरिने हो । त्यसैले गाउँछेउसम्म लिक बन्छ । बस्ती नै उठ्ने गरी हुँदैन,’ उनले भने ।, कान्तिपुरमा खबर छ ।
