मुस्ताङ,२२ असार– मुस्ताङमा टिपर दुर्घटना हुदा १५ जनाको मृत्यु भएको छ । सडक निर्माणमा काम गर्ने मजदुर बोकेको बा२ख २२१९ नम्बरको ट्रिपर दुर्घटना भएको जिल्ला प्रहरी कार्यालय मुस्ताङले जनाएको छ ।  दुर्घटनामा ११ पुरुष र ४ महिलाको मृत्यु भएको प्रहरी हवल्दार कृष्णगोपाल परियारले बताए । उनका अनुसार १७ जना घाइते भएका छन् । घाइतेमध्ये ५ जनालाई उपचारका लागि अस्पताल लगिएको छ ।
दुर्घटनामा परेका अघिकांश  मजदुरहरु कपिलबस्तु, सिन्धुली, स्याङ्जा, सल्यान  र दाङका रहेको  प्रमुख जिल्ला अधिकारी शिशिर पौडेलले जानकारी दिए । 
उपल्लो मुस्ताङको भेना भीरदेखि जैतुसम्मको सडक निर्माणमा काम गरिरहेका मजदुर बोकेको ट्रिपर स्याङ्बोचेमा दुर्घटना भएको हो । जिल्ला सदरमुकाम टाढा भएकाले काठमाडौं र पोखराबाट घाइतेको उद्दारका लागि हेलिकप्टर आउँदै गरेको प्रजिअ पौडेलले बताए ।